Bhubaneswar, Nailar:
Wat hapdeng ki jingpynsngewthuh paidbah kiba la nang ïai bteng na ka por sha ka po, ki aiñ, bad ki lad synshar, ka jingshongkha khynnah ka dang ïai bteng ha ka distrik Nabarangpur, kaba iehnoh ïa ka jingktah kaba beit ïa ka koit ka khiah bad ka lawei jong ki khynnah kynthei kiba dang samla.
Ki jingtip jong ka sorkar ki pyni ba ha kine ki lai snem ba la dep, 4,241 ngut ki khynnah rit ne kiba dang poh rta ki la pun khun, kaba pynpaw ïa ka jingnang jur jong ka jingeh.
Da kaba shim ïa ka sienjam kaba khatduh ban ïaleh pyrshah ïa ka jingshongkha khynnah, ka sorkar jylla ka la pynlong ïa ka jingïalap paidbah ryngkat bad ka jingkular ban pynkut noh ïa ka jingsniew ha ka imlang sahlang ha u snem 2030.
Ka jingshongkha khynnah ka dang long ka mat kaba kongsan ha ka imlang sahlang ha ka jylla ha kaba kumba 20.5 percent na ki kynthei kiba don ha ka rta 20-24 snem la ïathuh ba ki la shongkurim shwa ka rta kaba 18 snem kaba la shah kynnoh ba ka dei namar ka kolshor bad ka imlang sahlang kaba la rung jylliew bha, ka jingduk, ka jingduna ka jingnang jingstad bad ki rukom leh tynrai ha ki katto katne ki jaitbynriew riewlum.
Watla kane ka jingkheiñ ka long hapoh ka jingkheiñ ha ka ri kaba long 23.3 percent, hynrei katkum ka NFHS-5, ka jingdon jong kum kane ka jingleh ka la kham jur ha ki 12 tylli ki distrik ha kaba ha Nabarangpur, Nayagarh, Koraput, Rayagada, Malkangiri bad Mayurbhanj ki ïathuh ba ka jingdon jong kane ka jingleh ka long 30 percent.
Ka Nabarangpur ka dei kaba bun eh ki khynnah kynthei kiba shongkurim hapoh 18 snem haduh 39.4 percent.
Ki jingkheiñ ki pynpaw ba ka la don ka jingkiew ha ka jingbun ki khynnah shong kurim ha Odisha, kaba la kiew na ka 11 percent ha ka NFHS-4 sha ka 13.3 percent ha ka NFHS-5. Ka jingshongkha hapoh ka rta ka kham jur ha ki jaka nongkyndong (14.8 percent) haba ïanujor bad ki jaka sor (7.41 percent).
Kum shi bynta jong ka jingïalap, ka Surama Padhy Speaker jong ka Ïingdorbar Thawaiñ ka la pynsawa ïa ka ‘Bal Vivah Mukti Rath’, kaba la pynitynnad da ka jingkular bad ki khubor pynsngewthuh pyrshah ïa ka jingshongkha khynnah kin ïaid lyngba ki shnong ki thaw ha kylleng ka jylla haduh ka 8 tarik u Lber.
