Vijayawada, Nailar:
U Myntri Rangbah ka jylla u Nara Chandrababu Naidu ha ka sngi u Blei u la pynpaw ïa ka jingsngewnguh ïa u Myntri Rangbahduh ka ri u Narendra Modi bad ïa u Myntri ka tnat Road Transport jong ka sorkar pdeng u Nitin Gadkari hadien ba ka sorkar pdeng ka la mynjur ïa ka surok Kharagpur-Amaravati Greenfield Corridor kaba jrong 1,107 kilomitar. Ha ka jingthoh ha ka rynsan X, u Naidu u la ong ba 457 km jong ka surok bah 4 lane kan ïaid lyngba ka jylla Andhra Pradesh bad la antad ba kan pynlut haduh 32 hajar klur tyngka.
U la kdew ba kane ka lynti kan pynïasoh beit ïa ka Andhra Pradesh bad ka thaiñ mihngi jong ka India, kan pynduna ïa ka jinglut jingsep na ka bynta ki nongrep bad ki karkhana, bad kan pynsted ïa ka jingroi jong ka Amaravati kum ka jaka pdeng jong ka ïoh ka kot ha ka thaiñ.
Katei ka lynti kaba la tyrwa kan ïaid lyngba ïa ka West Bengal, Jharkhand, Odisha bad Andhra Pradesh, da kaba ïaid lyngba ka Araku Valley, Paderu, Chintapalli bad Jangareddygudem shwa ban kut ha Amaravati. U Naidu u la ong ba kane ka projek kan plie lad plie lad ïa ki karkhana, ka rep ka riang, ka khaïi pateng bad ka ïoh kam ïoh jam ha kylleng ka jylla.
