Ahmedabad, Nailar:
Ha ka jingwad bniah, ka tnad pulit jong ka Gujarat, Surat, ka la kem ïa u snar nongïalam uba la kynnoh ba u dei u nongpynïaid ïa ka kam thok, kaba pyndonkam da ki kam pynrung jingtip thok, ki Bank Account thok bad ki jingpynïaid pisa cryptocurrency ban shim kabu da ki klur tyngka.
Une uba shah kynnoh, u dei uba la tip kyrteng kum u Lovely bad la tip kyrteng ruh kum u Sameer bad kum u Ravi Arora, la lapdien sha Chennai hadien ba la pynlong ïa ka jingkhynra kaba jur bha bad la kem ïa u da ka kynhun ki runar ha ka Cyber Crime.
Ki pulit ki la ïathuh ba uba shah kynnoh u dei uba trei bad ka Cyber thok kaba don jingïadei bad ka China bad u dei uba don ka jingkitkhlieh ban ai ïa ki Bank Account ki bym shisha lyngba kiba la kynnoh ba la pynïaid ïa ka pisa ba la ïoh beaiñ bad pynkylla sha ka USDT shwa ban pynkynriah sha Dubai.
Ka jingtohkit ka la shim ïa ka jingkylla kaba khraw hadien ba ki pulit ki la ïoh kurup 14 tylli ki mobile phone, lai tylli ki laptop bad ki sim card na ka ïingsah jong une uba shah kynnoh ha Chennai.
Ha ka jingpeit bniah ïa ki tiar la kynnoh ba la lap ïa ki jingtip ba bniah jong ki 34 tylli ki Bank Account, pyrshah ïa ki 113 tylli ki jingujor halor ka Cyber Crime ha kylleng ka ri India, kiba ïadei bad ka jingleh thok palat ïa ka T.33.14 klur.
Hynrei la kynnoh ba kane ka kam thok ka don sa kawei pat ka jingma kaba lah ban kamai. Katkum ka jingïathuh jong ka Surat Cyber Crime DCP ka Vishakha Jain, une uba shah kynnoh u la ïoh ban ïoh ïa ki jingtip jong palat 33 lak ngut ki nongwad kam, la kynnoh ba ki ïoh na ki website kiba ai kam.
Nangta la pyndonkam ïa ki data ban ïakynduh ïa ki samla bym don kam don jam bad ban pynngop ïa ki da ki jingkular ban ai kam ban buh data na ïing. La kynnoh ba ki Call Center kiba treikam ha ki nongbah bapher bapher ki la ïakynduh ïa ki briew kiba lah ban shah ktah bad ki la tyrwa ïa ki ban trei ïa ki jingtip.
La bthah ïa ki nongshah pyndik ban siew kumba T.5,000 da kaba ai daw ba ki dei ban siew kyrteng, ban pahara ne kiwei kiwei ki jingdonkam kiba ïadei bad ka kam. Hynrei ynda la lum ïa ka pisa, la kynnoh ba katei ka kam ba la kular ka la kylla long sa kawei pat ka jingleh thok. U DCP jong ka Surat Cyber Crime u Vishakha Jain u la ong ba une uba shah kynnoh u la pyndonkam da ka Software thok kaba la ai kyrteng ‘Care Compass’ na ka bynta ka kam buh Data Entry.
Hadien ba kiba la ngat ha kane ka kam thok ki la pyndep ïa ka kam ba la aiti, la kynnoh ba la ïathuh ïa ki ba ki jingthoh jong ki ki duna ïa ka “jingpyntikna” kaba donkam bad kumta kin ym ïoh jingsiew.
Ïa une uba shah kynnoh, u Lovely la lapdien sha Chennai hadien ba la pynlong ïa ka jingkhynra kaba jur bha bad la kem ïa u da ka kynhun lehnoh ha ka Cyber Crime. Ka jingujor halor ka pisa kaba 10 hajar la lap ïa ka kynhun thok kaba don 70 klur tyngka ha ka Cyber
Nangta la pynshisha shuh shuh ba kito kiba la ngat ha kane ka apot ki la shah pynrem bunsien, ha kaba ym shym la pynphai biang ïa ka jingsiew ba la kular ne ïa ka pisa ba ki la thep. Ki nongtohkit ki la ïathuh ba katei ka jingleh thok ka la kynnoh ba ka la lum pisa palat T. 3.35 klur na palat 750 ngut ki briew hapoh ka jingpynpaw ba ka ai kam ha ka Data Entry.
La kynnoh ba katei ka kynhun thok kam shym la sangeh tang ha ka jingai kam thok. Ki pulit ki la lap ruh ba la kynnoh ba ki nongbei tyngka ki la shah pynngop da ki jingkular ba kin ïoh ïa ka jingmih kaba heh na ki jingbei tyngka ba la pyndonkam da ki dollar ha ka Stock Market.
Ha kawei kum kine ki kam ba la kdew da ki pulit jong ka Surat Cyber Crime, la kynnoh ba uwei u nongkhaïi u la shah thok haduh T.1.52 klur hadien ba u la shah khring ha ka kynhun thep pisa.
Haba pynshai halor ka rukom treikam, ka DCP jong ka Surat Cyber Crime ka Vishakha Jain ka la ong ba la pynrung nyngkong ïa une u briew ha kawei ka kynhun bad hadien kata la ai ID lyngba ka link. “La pyni ïa u nongkhaïi lyngba ka jingpynïasoh thok ba u la ïoh jingmyntoi shibun ha ki jingbei tyngka kiba ïadei bad ka ksiar.
Hynrei haba u la pyrshang ban sei ïa ka jingmyntoi ba la pyni, ym shym la lah ban sei ïa ka pisa. Dei hangta ba u la sngewthuh ba u la shah thok bad u la leit sha ki pulit”, la ong u Jain.
Ka jingtohkit ha kaba sdang ka la ïalam ïa ki pulit sha kiwei pat ki dkhot jong ka kynhun. Ki saw ngut kiba la shah kynnoh ba ki donktilang na Ahmedabad, Uttar Pradesh bad Rajkot ki la shahkem hashwa ha kaba ïadei bad kane ka kam runar.
Ha ka jingtohkit, ki pulit ki la kem ïa uwei uba shah kynnoh uba la tip kum u Shoaib, ha kaba la kynnoh ba ka jingtohkit jong u ka la ai ïa ki jingtip kiba kongsan shaphang u snar nongïalam ha kane ka kam thok.
Katkum ka jingong u DCP Jain, ka jingtohkit la lap ba u Ravi Arora u la leit bunsien sha Dubai bad mynshwa u la don ruh ïa ka jinglong nongshong shnong jong ka Dubai.
Ki pulit ki la lap ruh ba u la ju pynïaid ïa ka website kaba ïadei bad ka US Forex ha Dubai, hynrei u la wanphai biang sha India hadien ba u la mad ïa ka jingduhnong. Une uba shah kynnoh, uba wan na Rohtak ha Haryana, la ïathuh ba u la sah ha Mumbai, la kumba 11 snem eiei, shwa ba un leit sha katei ka kam thok, ong ki pulit. Ka jingpeit bniah ha kaba kut ka la pyni ba u treikam na Chennai.
