Kolkata, Nailar:
Ka Calcutta High Court ha ka sngi Ba-ar ka la bthah ïa ki pulit ba kim dei ban leh ïa kano kano ka sienjam ba pynbor pyrshah ïa u MP ka TMC u Abhishek Banerjee ha ki lai tylli ki mukotduma haduh ka 30 tarik u Naiwieng, da kaba ïohi ba ka jingtohkit ïa u hapoh phatok kam long kaba donkam.
U Justice Saugata Bhattacharyya u la bthah ruh ïa u MP ka Diamond Harbor ba un ai ka jingïatreilang bad ki jingtohkit bad ban kohnguh ruh ïa ki jingpynbna ba la pynmih da ki pulit. La bthah ïa ki nongtohkit ban ai jingtip ïa u ym duna ïa ka 48 kynta shwa ban dawa ban wan mih shabar.
Ka ïingbishar ka la bthah ïa ki pulit ban aiti ïa ka kaiphod jong ka jingïaid shaphrang halor ki jingtohkit ynda la bishar ïa kane ka kam ha ka 23 tarik u Naiwieng. Ka la ong ruh ba ki bor pynïaid ki lah ban leit sha ka ïingbishar ban pan jingpynkylla ne pyndam noh ïa ka jingïada lada u Banerjee um ïatreilang.
Ka kashari ka la bthah shuh shuh ba ka Banerjee kam lah ban leit shabar ri khlem ka jingbit jong ka. Hynrei ka la pynshai ba katei ka hukum kan ym ktah ïa ka jingai jingbit jong ka Supreme Court ha ka 10 tarik u Nailar kaba ailad ïa u ban leit shabar ri na ka bynta lai taïew ban ïoh jingsumar.
“Ka hukum ba la mynjur mynta ka sngi kan ym pynduna ha kano kano ka rukom ïa ka hok jong u nongmudui ban leit shabar ri ban shah sumar katkum ka hukum ba la mynjur da ka Ïingkashari ba donburom ha ka 10 tarik u Nailar, 2026, ban shah sumar, katkum ka jingbud ryntih ïa ki kyndon ba la kdew ha katei ka hukum,” la ong u Justice Bhattacharyya.
U nongïasaid aiñ jong u Banerjee u la ïathuh ha ka ïingbishar ba une u MP um pat leit shabar ri namar ba u dang ap ïa ka jingwan jong u doktor. U la pynpaw ruh ba ka Bank Account shimet jong u Banerjee, ryngkat bad ki Debit bad Credit card jong u, la khang da ka bank shimet.Ka jylla ka la pyrshah ïa katei ka jingkyrpad, da kaba kynthoh ba ka jingbit jong ka ïingbishar bahakhlieh duh ban leit shabar ri ka treikam tang ïa ka kam kaba don ha khmat jong ka.
Ka ïingbishar ka la kyntait ruh ïa ka jingkyrpad jong u nongïasaid aiñ ba kyrpang uba pan ban pynsangeh ïa ka jingtreikam jong ka hukum jong ka.
Ka ïingbishar bahakhliehduh ka la ai ha ka 30 tarik u Jylliew ïa ka jingïada shipor ïa u Banerjee na ki sienjam ba pynbor ha kaba ïadei bad ki lai tylli ki ejahar ba la mudui pyrshah ïa u ha ki thanat pulit Bhowanipore, Bishnupur bad Kalitala.
