Srinagar, Nailar:
Hadien ba la plie biang ïa ki mukotduma jong ka jingshah pynïap ki arngut ki Pandit Kashmir ha ki lehnoh ha u snem 1990, ka tnat tohkit State Investigation Agency (SIA) jong ka Jammu & Kashmir ka la plie biang ïa ka jingtohkit halor ka jingshah pynïap Wandhama ha u snem 1998 ha kaba 23 ngut ki Pandit Kashmir ki la shah pynïap ha ki lehnoh ha Ganderbal distrik kaba don ha ka bynta ba marpdeng jong ka Kashmir.
Katkum ki tyllong khubor ba la ïohlum, la plie biang ïa kane ka mukotduma ban tohkit da ka SIA ban lum ïa ki sakhi kiba thymmai halor ki jingpynïap briew bad ban lap bad pynngat ha ki kyndon aiñ ïa kiba donkti ha katei ka jingpynïap briew.
Ha ka miet ba hapdeng jong ka 25-26 tarik u Kyllalyngkot 1998, ki lehnoh kiba phong da ki jaiñ shipai ki la rung sha ki ïing jong ki longïing Pandit Kashmiri ha ka shnong Wandhama jong ka distrik Ganderbal bad ki la sdang ban siat pathar.
Ki 23 ngut ki briew kiba la ïap ki kynthup ïa khyndai ngut ki kynthei bad saw ngut ki khynnah. Ki pulit ka Ganderbal Police Station ki la buh da ka jingujor ejahar halor katei ka jingpynïap briew hynrei katei ka kam ka dang sah khlem lah ban pynbeit.
“Mynta ka SIA ka la plie biang ïa ka jingtohkit ïa kane ka kam. Baroh ki jingpyrshang kin long da ka tnad ban sei madan ïa ka jingthmu ban pynïap briew. Ka tnad kan sa lum ïa ki sakhi kiba lah ban ngeit ban lap ïa kiba donkti ha kane ka jingpynïap briew halor ka nongrim jong ki sakhi bad ki jingkren na ki nongsakhi”, la ong ki tyllong khubor na ki pulit.
Ki la ong ba ka jingtohkit kaba thymmai kan kynthup ïa ka jingbishar bniah ïa ka jingtohkit kaba kham mynshuwa, ka jingpeit bniah ïa ki kot ki sla bad ki sakhi kiba don, bad ka jingpyrshang ban wad ïa ki jingtip kiba thymmai kiba lah ban ïarap ban pynskhem ïa ka jingbud ryntih jong ki jingjia bad ban ithuh ïa kito kiba donkti ha katei ka jingpynïap briew.
Ka jingtohkit jong ka Wandhama ka dei shi bynta jong ka sienjam kaba kham heh jong ka SIA ban peit biang ïa ki katto katne ki mukotduma kiba ïadei bad ka jingshah pynïap jong ki Pandit Kashmir ha ki snem ba sdang jong ka jingïaleh pyrshah.
Katei ka tnad, ka la dep ban shim ïa ka jingtohkit halor ka jingshah pynïap jong u nongthoh bad myllung Kashmiri Pandit, u Sarwanand Koul Premi ha u snem 1990 bad u khun jong u, u Virender Koul.
Ha ka 12 tarik u Nailar, ka SIA ka la pynlong ïa ka jingkhynra ha ki khyndai tylli ki jaka ha J&K kum shi bynta jong ka jingtohkit jong ka halor ka jingshah pynïap jong u myllung bad nongthoh kot Kashmiri Pandit u Sarwanand Kaul Premi bad u khun ba rit jong u u Virender Kaul ha ki lehnoh ha u snem 1990.
U Premi, uba 65 snem ka rta bad u khun jong u, u Virender, uba 27 snem ka rta, ki la shah pynïap ha ki lehnoh ha u bnai Jymmang 1990, ha ka shnong trai jong ki, ka Soaf Shali, kaba don ha Kokernag kaba don ha ka thaiñ Anantnag distrik jong ka bynta ba shaphang Shathie jong ka Kashmir.
Ha u bnai Jylliew mynta u snem, ka SIA ka la mudui ïa ka mukotduma kaba 737 sla ha ka ïingbishar ha kaba ïadei bad ka jingshah rahbor bad pynïap ïa ka nongsumar Pandit Kashmir ka Sarla Bhat ha ka 19 tarik u Ïaïong 1990.
Ka jingmudui ka la pynpaw ïa ka kyrteng jong u Chairman jong ka JKLF u Mohammad Yasin Malik uba dang shah set patok mynta bad ïa saw ngut ki lehnoh jong ka JKLF halor ka jingshah kynnoh donkti jong ki ha ka ban pynïap ïa kawei ka Nurse.
Ka Sarla ka dei ka staff nurse ha Sher-i-Kashmir Institute of Medical Sciences (SKIMS) ha Srinagar bad ka la shah rahbor bad shah pynïap ha ki lehnoh ha ka 18 tarik, Ïaïong 1990.
Na ki 5 ngut kiba shah kynnoh, lai ngut ki la khlad noh katba u Yaseen Malik u don mynta ha phatok Tihar bad u la shah set phatok shi jingim ha ka mukotduma jong ka jingai pisa ïa ki lehnoh bad ki kam lehnoh da ka ïingbishar jong ka kynhun NIA ha Delhi.
Uwei pat uba shah kynnoh u Khurshid Ahmad Chalkoo la ngeit ba u la rung tuh sha PoK.
Ki Kashmiri Pandit ki la wan buhai shnong na Kashmir hadien ba la mih ki kam lehnoh ha ka Kshaid ha u snem 1990 bad ki la wan shong shnong ha Jammu, Delhi bad kiwei kiwei ki bynta jong ka ri.
Ka SIA ka la khreh ruh ban plie biang ïa ki ar tylli ki mukotduma ba pawnam halor ka jingshah pynïap u Tika Lal Taploo, uba dei u Vice President jong ka BJP ha J&K ha katei ka por bad u Justice (Retd) Neelkanth Ganjoo, uba la pynïaid ïa ka jingbishar ha kaba la rai pynrem ïap ïa u nongseng jong ka JKLF, u Maqbool Bhat .
U Taploo u la shah siat ïap ha ki lehnoh ha ka 13 tarik u Nailur, 1989 katba u Justice (Retd) Ganjoo u la shah pynïap ha ki lehnoh ha surok Hari Singh ha Srinagar ha ka 4 tarik u Naiwieng, 1989.
