Jaipur, Nailar:
U Myntri jong ka tnat Agriculture ka Rajasthan u Kirodi Lal Meena, u la ïoh ïa ka jingpang Swine Flu bad u la shah sumar ha ICU jong ka Sawai Man Singh Hospital ha Jaipur, ong ki heh sorkar ha ka sngi Balang.
U Meena u la leh ïa ka test swine flu khyndiat sngi shwa bad u la shah sumar ha hospital hadien ba ka kaiphod ka la wan biang ba ka don ïa ka jingpang. La pynkynriah noh ïa u sha ICU ha ka miet jong ka sngi Ba-ar na ka bynta ka jingsumar kaba kham bniah.
Ki doktor ki la ai jingmut ïa u Myntri ba um dei ban ïakynduh ïa ki nongwan jngoh ne ki bahaïing ha sem khnang ban ïada na ka jingsaphriang jong ka jingpang.
U Principal jong ka SMS Medical College u Dr Deepak Maheshwari u la ïathuh ba ïa u Meena la sumar katkum ki kyndon jong ka Swine Flu.
Ki test kiba donkam ki dang pynlong bad ka kynhun ki doktor ba la khlieh da u heh ka tnad Medicine u Dr Mahendra Agrawal ki dang buddien ïa ka jinglong jingman jong u, u la ong.
