Shimla, Nailar:
Ka kynhun Myntri jong ka Himachal Pradesh kumba ka la rai, ka la pynkhreh ban pynrung ïa ki longïing ki bym don dkhot kiba la san hapdeng 18 bad 59 snem, kito kiba la khlieh da ki kynthei, lane kiba ka khlieh jong ki ka don ka jingduna ha ki dkhot met kaba 50 per cent shaneng ha ka kyrdan Below Poverty Line (BPL).
Ki longïing kiba la trei ym duna ïa ka 100 sngi hapoh ka MGNREGA ha u snem mang tyngka ba la dep bad ki longïing kiba ki dkhot kiba kamai ki don ïa ki jingpang bampong kum ka jingpang bampong, jingpang Alzheimer, jingpang Parkinson, jingpang Muscular Dystrophy, thalassemia lane kano kano ka jingpang kaba pynlong ruh ïa ki ban duna dkhot met bym lah shuh ban sumar ne pynkoit ha ka kyrdan BPL, katkum ka rai la mynjur ha ka jingïalang ka kynhun Myntri ba la pynïaid da u Myntri Rangbah ka jylla u Sukhvinder Singh Sukhu.
Ka Himachal Pradesh mynta ka don 2.66 lak tylli ki longïing BPL. Ka jingpynrung ïa ki longïing ha ka kyrdan ka long katkum ki kyndon ba la buh da ka tnad pynroi nongkyndong jong ka sorkar kmie. Ki kyndon ba la mynjur da ka kynhun Myntri jong ka Himachal ki long nalor ka thup jong ka sorkar kmie.
Ka tnad pynroi nongkyndong ka ong ba ka longïing kaba don ïa ka jaka kaba duna ïa ka shi hectare; ka jingbym don ka ïing kaba heh kaba neh; ka jingbym siew khajna kamai kajih; ka jingbym don kano kano ka kali; ka jingbym don ka jingmih kaba man ka por na ka tulop, ka penshon, ne ka jingsiew; ka jingbym don dkhot kaba trei ha ka kam sorkar ne kam shimet kaba man ka por ne kaba la ïateh kular lah ban pynrung ha ka thup jong ka BPL. Ka tnad ka bynrap ruh ba ka jingïoh jong kum kine ki longïing kam dei ban palat ïa ka T. 2,500 shibnai.
U Myntri khynnah jong ka Rural Development u Anirudh Singh u la ong ba ka jylla ka la pynkylla thymmai ïa ki kyndon jong ka jingïoh ha ka shisnem: “Mynta ïa ki longïing kiba ïoh ha ka shisnem haduh T.1.11 lak yn pynrung ha ka kyrdan BPL. Ka kyndon kaba kham mynshuwa, katkum ka sorkar kmie, ka long T. 30,000 shisnem. Kumba ka long mynta, ki don kumba 2,66,304 tylli ki longïing BPL ha ka jylla. Ka jingkheiñ kan sah haduh kumjuh.”
