Lucknow, Nailar:
Ka liengsuiñ training kaba don ar tylli ki enjin, kaba shong saw ngut, ka la hap ha kawei ka madan hajan ka wah Ganges, ha Uttar Pradesh, ha Kanpur, ha ka sngi Palei, ha kaba u pilot bad u co-pilot, ki la ïap.
Katkum ka jingïathuh ki pulit, uwei na ki pilot u dei uba dang shah hikai bad uwei pat u dei u nonghikai.
Kine ki arngut ki dei kiba la tip kyrteng kum u Sachin Bhatia na Gujarat bad u Abhishek Pujari na Karnataka bad ki la kiew ha ka por 11:30 baje mynstep na ka jaka hikai liengsuiñ jong ka Garg Aviation kaba don ha Kanpur.
Kane ka jingjia ka la jia ha ka por kumba 11:50 mynstep ha ka por ba ki dang her sha suiñ ban leit phai biang sha ka jaka ai jinghikai.
“Ngi la ïoh jingtip shaphang u nonghikai. U la don ka jingshemphang kumba 3 hajar kynta eiei. La pyntip sha u DGCA. Ka kynhun jong ki kan pynlong ïa ka jingtohkit kaba bniah. Ki pulit ki la ïada ïa ka jaka baroh kawei,” la ong u Raghubir Lal, Police Commissioner jong ka Kanpur Nagar. Ki bor ba kyrkieh bad ki bor pynïaid ki la leit mar mar sha katei ka jaka.
Ki dur na ka jaka ba jia ki pyni ïa ka liengsuiñ kaba la shah pynpra lut ha ka jaka kaba jyrngam bad kaba don ki dieng.
Lah ban ïohi ïa ki bynta nar jong ka liengsuiñ ba la pynkhih, ha kaba ka thapniang bad kiwei kiwei ki jingsop ki la bthei ha ki bynta bynta.
Ym pat lah ban tip ia ka daw kaba thikna jong ka jinghap jong katei ka liengsuiñ.
Ki heh sorkar ki la ïathuh ba ka la jia hadien ba ka liengsuiñ ka la duh bor. Ïa kane ka liengsuiñ ai jinghikai la wanrah sha kane ka jaka ha u snem 2023, la bynrap shuh shuh ki heh sorkar.
