New Delhi, Nailar:
Ki la don kumba 177 ngut ki briew kiba la ïap bad palat 1,300 ngut ki dang jah rngai hadien ka jingshlei um bad jingtwa khyndew ha Nepal ha ka sngi Balang.
Ha Nepal, ki pulit, ki la ïathuh ba ki don 177 tylli ki met ïap, katba 823 ngut ki briew, ba kynthup ïa 517 ngut ki nongjngohkai pyrthei, ki dang sah khlem lapdien.
Ha Tibet, ka China, ka ïathuh ba ki don 3 ngut kiba ïap bad 558 ngut kiba jah rngai bad kitei ki kynthup ïa 260 ngut kiba nabar.
Ka tnat treikam jong ka Nepal, ka ïathuh ba ki don 823 ngut ki briew, ïa ki ba ym pat lah ban ïoh jingtip ei ei shaphang jong ki ha ka sngi Palei.
Ka India, ka la phah 10 ton ki jingïarap ïa ki briew bad ki dawai ba kongsan, katba ka US, ka la pynbna ïa ka jingïarap kaba kyrkieh, kaba $500000.
Ka Indian Embassy ha Kathmandu ka la ai ïa ki Emergency Number na ka bynta ki jingïarap bad ki jingtip kiba ïadei bad ki nong India kiba la shah ktah ha kane ka jingshlei um.
Ha ka jingthoh ha ka rynsan X, ka la ong ba ki briew ki lah ban phone ha u number +977 985 131 6807 lane +977 970 910 7500 .
Ka Nepal Tourism Board ka la phah ïa u Toll Free Emergency Number 1234 lane u Hotline 1144 lane u Tourist Police 9851289445 khnang ban ai jingïarap.
Ka Bihar bad ka Uttar Pradesh ki la shah buh ha ka jingmaham kaba khraw ha ka sngi Balang hadien ba ka jingshlei um ha ki ri ba marjan jong ka Nepal ka la wanrah ïa ka jingjulor ha kylleng ki katto katne ki distrik ha ka wah Gandak.
Ki bor synshar ki la sdang ïa ki jingpynkhreh kyrkieh, kynthup ïa ka jingpynkynriah ïa ki briew na ki jaka ba lah ban shah ktah.
