New Delhi, Nailar:
Ki bor ba dei khmih ki la ïai pynkynmaw bad pyntreikam pyrkhing ha kaba ïadei bad ka jingkhang ban pyndonkam ïa ki jingbam myllen kiba ktah ïa ka koit ka khiah jong ki briew, kane ka dang ïai bteng kumba la dep ban buh hukum ba kan long sa shi snem.
Napdeng ki jylla ha kaba la khang ïa u Gutkha bad Pan Masala ki kynthup ïa ka Uttarakhand, Bihar, Delhi, UP bad WB. Dang ha u snem ba la lah, ïa ki jingpyrkhing ha kaba ïadei bad kane ka bynta la khang na ka bynta shi snem bad la nang pynjlan ruh sa sha kiwei pat ki snem ha kine ki jylla.
Ha u snem ba la lah, ka jylla West Bengal ka la pynbna ban khang na ka bynta shi snem ha ka ban pynmih, ban buh bad ban die ïa ki Gutkha bad ïa ki Pan Masala kiba khleh lang bad u duma.
Kumba la phah jingthoh da ka tnat ka koit ka khiah jong ka West Bengal, ïa kane ka rai la shim kum shi bynta ban pyrkhat ïa ka koit ka khiah jong ki briew kiba ju shah ktah jur na ka jingpyndonkam ïa kum kine ki jingbam pynmyllen na ka por sha ka por. Kumba la ïathuh la ong ba ka jingkhang ïa u Gutkha bad ïa u Pan Masala la pyntreikam ruh ha ki shi snem ba la leit. Ki kyndon kiba thymmai ha kaba ïadei bad kane ka bynta kin sa treikam hashwa ban kut ka por ba la buh.
Ha ka jingthoh ba la phah da ka sorkar jylla, la ong ba ki duma kiba long ki jingbam pynmyllen kiba kynthup ïa u Gutkha, Pan-Masala ki ktah ïa ka koit ka khiah jong ki briew namar ïa ka bih Nicotine la lap ba ka kham bun ha u duma. Katei ka jingai hukum ka la ong ruh ba ka kyndon 30 jong ka Food Safety and Standards Act, 2006 ka la aibor ïa u Commissioner of Food Safety na ka bynta ban pyntreikam halor ka jingpyrkhing ha ka ban pynmih, ban buh, ban pynpoi kylleng ne ban die ïa kum kine ki jingbam myllen ha kylleng ka jylla, ha kaba ka sorkar Bengal ka la dep ban shim ïa ka rai. Hashwa kane, kiba bun kiwei pat ki jylla kiba don hapoh ka ri, ki la pyntreikam pyrkhing bad khang ban die ïa ki Gutkha bad ki Pan Masala kiba khleh Nicotine.
