New Delhi, Lber:
Ka sorkar hadien ba ka la plie paidbah ïa ka skhim thymmai kaba la khot ka Resilience and Logistics Intervention for Export Facilitation (RELIEF) ban ïarap ïa ki nongshalan mar shabar ri India ban ïakhun ïa ki jingeh kiba mih na ka jingthut kaba dang ïaid shakhmat ha West Asia, da kaba thmu ban pynthikna ïa ka jingïakhaïi kaba ïaid beit ïaid ryntih bad ban ïada ïa ka bhah ïew jong ka ri, ka la sakhi ba ka la wanrah jingmyntoi shibun bad don jingkyrmen ban nang kyntiew ha kiba bun ki liang.
“Ka skhim kan ai jingkyrshan ba la thmu sha ki nongshalan mar shabar ri, khamtam ïa ki karkhana rit bad pdeng, kiba ïakynduh jingeh ha ka jingtreikam namar ka jingthut ha ka jingkit mar bad ka jingpynpoi mar,” ong u Commerce Secretary u Rajesh Agrawal .
“Ka jingpyrkhat kan long ha ki 17-18 tylli ki jaka kiba la shah ktah khamtam eh ha ka jinglong jingman ha West Asia bad ka thaiñ Gulf,” u la bynrap. Ka jingthmu ba kongsan jong kane ka kam ka long ban pynthikna ba ka jingshalan mar shabar ri kan ïai bteng katba lah wat hapdeng ki jingeh, la pyntip u Agarwal.
“Ka skhim ka khmih lynti ba kan pynduna ïa ka jingkit jong ka jinglut jingsep kaba heh bad ka jingkiew dor jong ka bai Insurance, kaba la kiew bha namar ka jingïakynad,” u la ong shuh shuh.
Ka RELIEF kan ktah ïa baroh ar ki nongshalan mar shabar ri kiba la shim Insurance bad ki nongshalan mar shabar ri MSME ki bym don Insurance na ka bynta shibnai, ryngkat bad ka jingkyrshan ïa ki jingshalan mar ha ki por ban wan haduh lai bnai.
Ïa ka jingpynlut na ka bynta kane ka skhim yn pyndap na ka jingmang pisa kaba la don lypa hapoh ka Export Promotion Mission.Ka sorkar ka dang trei ruh lyngba ka kynhun jong ki Myntri Sorkar ban weng ïa ki jingeh ba ki nongshalan mar shabar ri ki ïakynduh.
U Agrawal u la kdew ba ki jingkit ki nang slem bad, ha ki katto katne ki khep, kim poi sha ki jaka ba ki leit namar ka jingthut ha ki lynti ba kongsan.Ka jinglong jingman kaba mynta ka dei hadien ka jingshah thombor lang ha u bnai ba la dep da ka America bad ka Israel ïa ka Iran, kaba la ktah ïa ki lynti ïaid lieng bad ki lynti liengsuiñ kiba kongsan ha kane ka thaiñ.
Kane ka la pynkiew dor ïa ka umphniang bad ka la pynkiew ïa ka jinglut jingsep ha ka leit ka wan, kaba la ktah ïa ka khaïi pateng ha ka pyrthei. Ka sorkar ka kyrmen ba ka skhim RELIEF kan ïarap ïa ki nongshalan mar shabar ri ban ïaid lyngba ïa kine ki jingeh bad ban pynneh ïa ka jingtuid jong ki mar ha ka por ba don ka jingdawa.
