Bengaluru, Nailar:
U Symbud Myntri Rangbah u G Parameshwara ha ka sngi Palei u la bthah ïa ki Deputy Commissioner ban ithuh ïa ki jaka na ka bynta ym duna ïa ka 50,000 tylli ki jaka shna ïing haman la ki distrik. U la ong ba ha ka bynta kaba nyngkong, ym duna ïa ka 5 lak tylli ki jaka dei ban sam shwa u bnai Nohprah.
U DCM u la pynlong ïa ka jingïalang bishar bniah bad ki heh ka tnad Revenue lyngba ka video-conference bad ki Deputy Commissioner. U la bthah ïa ki heh sorkar ban wad ïa ki jaka kiba biang hapoh ka 15 tarik u Nailur. “Ka jaka ka dei ban ïoh ïa ka surok bad ka um bad ka dei ban don hajan ki shnong ki thaw”, u la ong. Yn ai jingmut nyngkong eh ha ka jingai jaka ïa ki bynta kiba rit paid, kynthup ïa ki Dalit, ki jaitbynriew kiba sahdien, ki rit paid, ki briew kiba don jingduna ha ki dkhot met, ki longkmie kiba la ïap lok bad kiba ngat ha ka jingshah thombor bad shongkha khynnah.
U Parameshwara u la pynpaw ruh ïa ka jingsngewkhia halor ka jingpynslem ban pynbna ïa ki shnong ba ïoh khajna. Na ki 10,896 tylli ki shnong kiba la buh thong, tang 3,354 tylli la pynbna haduh mynta. U la bthah ïa ki DC ban phah ïa ki jingtyrwa kiba dang sahteng na ka bynta ka jingpynbna shwa hapoh 15 sngi bad ban pyndep ïa ki jingpynbna ba khatduh khlem da pynslem. U la bthah ruh ïa ki heh sorkar ban pynsted ïa ka jingpynrung kyrteng ïa ki kot ki sla. Na ki 2.05 lak tylli ki kot ki sla ba la sam, kumba 1.55 lak tylli la pynrung kyrteng. U la buh ïa ka 30 tarik u Nailur kum ka tarik ba khatduh ban pyndep ïa katei ka kam.
Halor ka jingpynlong digital ïa ki jingthoh jingtar jong ki jaka puta, u Parameshwara u la ong ba la pyndep ïa ki kam ha ki 10 tylli ki distrik, katba 21 tylli ki distrik ki dang hap ban pyndep ïa ka. Palat 24.43 klur ki sla ki dang sahkut ban pynkylla digital. U la kyrpad ruh ïa ki tahsildar ba kin pynsted ban pynbeit ïa ki aplikeshon ba dang sahteng. Na ki 14.37 lak tylli ki aplikeshon kiba la pdiang, haduh 6.99 lak tylli ki dang sahteng.
