Kolkata, Nailar:
U Myntri Rangbah ka West Bengal, u Suvendu Adhikari, ha ka sngi Saitjaiñ, u la ong ba yn sa ujor da ka ejahar pyrshah ïa ka Myntri Rangbah barim ka Mamata Banerjee halor ka jingpynkheiñ ïa ka hukum jong ka Calcutta High Court ha ka jingïalang paidbah ban rakhe ïa ka sngi seng ïa ka kynhun ki samla pule ka Trinamool Congress, ka Trinamool Chhatra Parishad (TMCP) ha ka sngi Thohdieng.
Ka Calcutta High Court ka la ai jingbit da ki kyndon ïa ka kynhun tynrai jong ka Trinamool Congress ba la ïalam da ka Mamata Banerjee ban pynlong ïa katei ka jingïalang ba la kdew hapdeng jong ka Kolkata ha ka sngi Thohdieng.
Hynrei la kynnoh ba la pynkheiñ ïa kiba bun ki kyndon ba la buh da ka Calcutta High Court, khamtam eh kaba dei ban pynlong ïa ka rally ban khang tang ha kawei ka lynti bad ban pynlong laitluid ïa ka lynti kaba ar na ka bynta ka jingïaid kali.
Ha kaba ïadei bad kita ki jingpynkheiñ, u Adhikari u la ïathuh ha ki lad pathai khubor ba ki jingpynkheiñ ïa ki kyndon ba la buh da ka Calcutta High Court ki long kiba lah ban ïohi.
“Ka Kashari ka la bthah shai ïa ngi ban pynlong ïa ka jingïalang paidbah da kaba pynlong ïa kawei na ki ar tylli ki lynti ba laitluid na ka bynta ka jingleit jingwan jong ki kali. Ka Myntri Rangbah barim ka la lum briew bad khang ïa baroh ar tylli ki lynti. Nga la bthah ïa ki pulit ban ujor ejahar halor kane ka kam. Nga la bthah ruh ïa ki pulit ban leit sha ka Calcutta High Court halor kane ka kam. Yn sa pynsuk ha kaba ïadei bad kane ka bynta,” la ong u Myntri Rangbah.
U nongïalam jong ka kynhun “pyrshah seng” ha ka Trinamool Congress, u Ritabrata Banerjee, uba dei u nongïalam ba mynta bad ba thikna jong ka Liang Pyrshah ha West Bengal Assembly, u la kyrshan ïa ki jingkynnoh jong u Adhikari halor ka jingpynkheiñ ïa ki kyndon ba la buh da ka Calcutta High Court na ka bynta katei ka jingïalang ba la kdew.
“Ka Calcutta High Court ka la ai ka jingbthah kaba kyrpang halor ka jingbun tam ki briew ki ban shah ban ïashim bynta ha katei ka jingïalang, katba ka la hukum ban khanglad ïa ka jingïalang sha kawei ka lynti. Ka Myntri Rangbah barim ka la ïohi ïa ka jingkhihwin jong ka kynhun jong ki nongbud jong ka ban ïaid lyngba ki jingker bad ban phiah ïa ar tylli ki lynti bad ban pyndonkam ïa baroh kawei ka surok. Kane ka jingleh lymwir jong ki kem dei kaei kaei ka ban hap ban wad bniah,” la kynnoh u Banerjee.
Ha ka por ba ujor ïa kane ka kaiphod, kam shym la don kano kano ka jingkynthoh na ka liang ba ïalam da ka Mamata Banerjee halor kane ka kam.
Haba ai jingkren ha ka jingïalang paidbah ha ka por shiteng sngi jong ka sngi Thohdieng, ka Myntri Rangbah barimk ka la ong ba ki jingleh palat pud jong ka sorkar Jylla kaba mynta kaba la synshar da ka Bharatiya Janata Party (BJP) kan ïarap ïa ka Trinamool Congress ban ïoh biang ïa ka bor synshar ha kane ka jylla ha kine ki sngi ban wan.
“Ki nongkyrshan ba rit paid jong ka BJP kin sa ai jingsnem ïa la ki jong ki nongïalam ka seng. Shen ka Trinamool Congress kan wan biang ha ka bor synshar ha West Bengal,” ka la ong ha ka sngi Thohdieng.
