New Delhi, Nailar:
Haba pynpaw ba ka Campaign ‘Nasha-Mukt Yuva for Viksit Bharat’ ka nang kiew stet ha kylleng ka ri, u Myntri Rangbahduh ka ri u Narendra Modi ha ka sngi U Blei u la ong ba kane ka jingïakhun kam dei tang ka jingpynlong ryntih, namar ba bun ki briew khamtam ki samla ki ïasnohkti lang bad ka ha ka jingbun paid.
U Myntri Rangbahduh u la pynpaw biang ïa ka jingkular jong ka sorkar ban don ka jingkut jingmut lang na ka bynta ka koit ka khiah, ka jingkmen bad ka lawei kaba phyrnai jong ki samla jong ka ri India. U la ong ba ki samla pule kynthei jong ka ri India bad kiwei kiwei ki ri ki trei ban phah ïa ki Satellite sha Orbit kum shi bynta jong ka ‘Mission ShaktiSAT’.
U la ong ba ki jingpynkhreh ki dang ïaid shakhmat ban phah ïa u satellite, uba la shna pura da ka jingïashim bynta jong ki samla pule kynthei, sha ka Orbit jong u bnai.
Ha ka prokram radio jong u kaba man u bnai ka, ‘Mann Ki Baat’, u Modi u la kyrpad ruh ïa ki nongshong shnong ban ïasnohktilang ban pyllait ïa ka India na ka jingma jong ka jingdih drok bad ban pynthikna ïa ka lawei kaba phyrnai na ka bynta ki samla ka ri.
Haba kren halor kane ka jingthmu, u Modi u la ringdur bad batai shaphang ka jingshah ktah jong kito kiba pyndonkam ïa u drok, ha kaba la ong ba ka jingkyrni ha ka jingdih drok kam ktah tang ïa ka imlang sahlang, hynrei ïa ka ïing ka sem bad ka kynhun jait bynriew ha kaba kine baroh ki hap ban kit ïa ka lyngkor kaba khia..
Haba khot ïa ki briew na ki bynta bapher bapher ban wan shakhmat bad ban ïaleh pyrshah ïa ka jingma jong u drok lyngba ki jingthoh bad ki kam kiba thymmai, u la ong, “Hato phi lah ban wanrah ïa ka jingpyrta kaba khlaiñ bor na ka bynta ka ri India kaba lait na u drok? Hato ki samla nongtem jong ngi ki lah ban thaw ïa ki jingrwai kiba pynsngew ïa ka khubor jong ka jingim kaba lait na u drok?
Hato ki samla pule bad ki kynhun pynbyrngia ki lah ban thoh ïa ki drama lyngkot kiba ktah ïa ka mynsiem kiba pynpaw ïa ka jingma jong u drok katba ki pyni ruh ïa ka lynti ban koit? Ka ri jong ngi kam duna ïa ki nongthaw lynnong kiba tbit bha. Nga kyntu ïa ki ban thaw ïa ki jingthoh ha ki ktien bapher bapher kiba ïarap ïa ka imlang sahlang ha kane ka jingpyrshang. To ïasam ïa ki jingpyrshang jong phi ha ki lad pathai khubor da kaba pyndonkam ïa u Hashtag uba ïadei.”
U la ong ba ka jingïalap ‘Har Ghar Tiranga’ ka pynkiew ïa ka jingsngew ïeid ri. U la kren ruh shaphang kumno ka ri ka rakhe ïa ka jingdap 150 snem jong ka ‘Vande Mataram’.
