Chennai, Nailar:
Haba pyntreikam ïa ka rai jong ka DMK ban pynbeit thymmai ïa ka rukom treikam jong ka, u President jong ka seng MK Stalin ha ki khyndiat sngi jong ka taïew ba la lah u la pynbna ban pynbun ïa ki kynhun seng na ki distrik na ki 77 tylli kiba la don lypa sha ki 110 tylli bad u la batai bniah ïa ka jingdon jong ki Assembly Constituency ban kynthup da kawei pa kawei ka distrik katkum ka jingbun briew.
U Stalin u la bthah ïa ki District Secretary kiba la don lypa ban pynlong ïa ki jingïalang jong ka komiti treikam ha ka jingdon lang u nongmihkhmat ba la thung da ka ophis treikam jong ka seng.
Ki dei ban ai ïa ki jingai jingmut hapoh 15 sngi halor ka jingphiah ïa ka sor, ka synjuk, ka thaiñ, ka Town Panchayat, ka Ward bad ki tnat treikam jong ki kynhun seng hapoh ka rukom pynïaid distrik kaba thymmai.
U Myntri Rangbah barim ka jylla, ha ka jingthoh jong u ha ki Social Media, u la pynkynmaw ïa kawei ka jingkren jong u ha u snem 2018, ha kaba u la shah jied kum u President ka seng, ha katei ka juh ka sngi (28 tarik Nailar), shaphang ban pynïadei bad ka jingkylla jong ka por bad u la khot ïa ki jingkylla ban sdang napoh jong ka seng. U Stalin u la ong, “Ïa ka jingleh (pynbeit thymmai) la leh da kaba pyrkhat ïa ka jingmyntoi jong ka seng. Da ka jingkyrshan jong phi, sa shisien ngan ïalam ïa ka seng jong ngi sha ka jingjop!”
U Stalin u la ong ba ka Chennai distrik kan ïoh 10 tylli ki kynhun seng ha ki distrik na ki 6 tylli kiba la don lypa.
Kumjuh ruh kiba bun ki distrik kiba ïoh khajna, lait noh ka Kancheepuram, Perambalur, bad Ariyalur, kin ïoh ïa ki kynhun seng distrik kiba thymmai ban pynthikna ïa ka jingpynïaid barit ïa ki kam jong ka seng.
U la ong ba tang ïa ka Sholinganallur Assembly konstitwensi yn pynlong ïa ka kynhun distrik kaba kyrpang, haba pyrkhat ïa ka jingbun paid jong ki nongshong shnong.
Ha ka shithi sha ki nongïalam jong ka seng, u Stalin u la ong ba ïa kane ka rai la shim ha ka jingïalang jong ka DMK Headquarter Executive Committee kaba la long ha ka 22 tarik u Nailar.
U la ong, ka seng ka la rai ban pynlong ïa ka elekshon jong ka kynhun seng kaba 16.
