Patna, Nailar:
Ka sorkar Bihar ka la rai ban weng noh ïa ka kyntien “Fail” na ki Marksheet jong ki khynnah skul kiba ïakhun ïa ki eksamin ba la pynlong da ka Bihar School Examination Board (BSEB).
U Myntri ka tnat pule puthi jong ka jylla, u Mithilesh Tiwari, u la ong ha kine ki khyndiat sngi ba la leit ba hapoh katei ka jingthmu ban pynkylla, ki samla pule ki bym lah ban pyndep ïa kano kano ka eksamin kin don ïa ka kyntien “Eligible for Skill Training” ba la kdew ha ki Marksheet jong ki ha ka jaka jong ka “Fail”.
U la ong ba yn sa pynkylla ïa ki kyndon katkum kane, bad shen ka tnad pule puthi kan sa ai ïa ki jingbthah kiba donkam sha ka BSEB.
“Ka jingbym lah ban ïoh ïa ki Marks ba la khmih lynti ha ka eksamin kam pynduna ïa ka sap jong u khynnah,” ong u Myntri, da kaba ban jur ïa ka jingdonkam ban pynshlur ïa ki khynnah skul ban ïa kaba buh dak ïa ki katkum ka jinglah jong ki ha ka eksamin.
U la pynbna ruh ba yn pynlong ïa ki klas ba kyrpang na ka bynta shibnai na ka bynta ki khynnah skul kiba mih ïakhun ha ka eksamin matrik khnang ban ïarap ïa ki ban pynkhreh kham bha bad ban kyntiew ïa ka lad ban ïoh ïa ka jingjop.
Ha kajuh ka por, u Myntri Rangbah ka jylla u Samrat Choudhary la buh ban plie paidbah ïa ka Teacher Support Portal ha ka sngi burom ki nonghikai ka ban rakhe ha ka 5 tarik Nailur.
Yn jied uwei u nonghikai na kawei pa kawei ka distrik na ka bynta ka khusnam ha ka kyrdan jong ka jylla, katba ki khynnah skul na ki skul model jong ka sorkar bad ki nonghikai na ka DIET bad SCERT kin leit sha katei ka jingïalang
Ka sorkar jylla ka la pynmih ruh ïa ka “Vidya Saathi”app na ka bynta ki khynnah klas 9 haduh 12. Kane ka bynta kan pynïasoh ïa ki khynnah skul bad ki nonghikai baroh shilynter, ha kaba kumba 75,000 ngut ki nonghikai la khmih lynti ba kin ai ka jingkyrshan marwei marwei ha ka jingpule.
Kane ka jingthmu ka long ban ailad ïa ki samla pule ban ïoh jinghikai online ryngkat bad ka jinghikai ha ki kamra klas bad ban ïarap ïa ki ban pynkhreh ïa ki eksamin ba ïakhun, kynthup ïa ki eksamin rung skul ha ka liang ka Medical bad ki Entrance Test ha ka Engineering.
Uwei u heh sorkar u la ïathuh ba ki khynnah klas 9 haduh 12 kiba la pynrung kyrteng ha ki 700 tylli ki skul model Saraswati Vidya Niketan ha kylleng ka Bihar kin ïoh ïa ka lad ban pyndonkam khlem jingsiew khlem pud ïa kane ka bynta.
