New Delhi, Nailur:
Kumba la buh jingkheiñ la ong ba hadien 25 snem ba la mih ka jingïakynad halor ka jingïasam um hapdeng ka Bihar bad ka Jharkhand, kine ki ar tylli ki jylla ha ka lah sngi U Blei ki la ïasoi ïa ka soskular ban ïasam ïa ka um jong ka wah Sone ha ka jingïadon lang u Myntri ka tnat ki kam pohïing jong ka sorkar pdeng u Amit Shah.
U Shah u la ong ba kane ka jingïateh ka la pynbeit ïa ka jingïakynad halor ka um kaba la slem bha ha ka thaiñ Mihngi jong ka ri India bad kan ai ïa ka um ba la pynlang sha ki lak ngut ki nongrep ha kylleng ki jaka nongkyndong kiba heh jong ka Bihar bad Jharkhand, nalor ban pynthikna ïa ka jingpynbiang umbam-umdih.
U la ong ba kane ka rai ka long ka nuksa kaba bha tam jong ka jingthmu ‘Team Bharat’ bad ka synshar paidbah kaba ïatreilang kaba la kyrshan da u Myntri Rangbahduh ka ri u Narendra Modi.
U Shah u la bynrap ba kane ka dei ka jingïateh kaba saw ban ïasam um hapdeng ki jylla mynta u snem, kaba kan pynbha ïa ka jingdon um na ka bynta ki jingpynlang um, ki jingpynroi ha ki than nongkyndong bad ki jingthmu halor ban pynbiang ïa ka umdih.
U Myntri ka tnat ki kam pohïing jong ka sorkar pdeng u la ong ba kane ka jingïateh kan pynthikna ïa ka um kaba biang na ka bynta ban dih bad ban pyntuid um na ka bynta ki paidbah kiba bun ha kylleng ki distrik jong ka Bihar kum ka Bhojpur, Buxar, Rohtas, Kaimur, Aurangabad, Arwal, Gaya bad Patna.
Ha Jharkhand, ka um ruh kan sa long kaba lah ban pyndonkam na ka bynta ban pyntuid um bad ban dih ha Palamu, Garhwa bad kiwei kiwei ki thaiñ.
Ha kane ka sngi la don lang u Myntri Rangbah jong ka Jharkhand u Hemant Soren, u Myntri Rangbah ka jylla Bihar u Samrat Choudhary, u Myntri ka sorkar pdeng uba dei khmih ïa ka Jal Shakti u C R Patil, u Symbut Myntri Rangbah jong ka Bihar, u Home Secretary bad ki heh ophisar na ka sorkar India bad jong baroh ar tylli ki jylla.
