Bhopal, Nailur:
Kumba la pynshisha, la ong ba uwei u briew ïa uba la shah pynshisha ba u la leh mynleh kum u heh ka Indian Police Service (IPS) jong ka snem 2016 bad uba la kam ba u trei bad ka tnad Income Tax u la shah kem ha Bhopal hadien ba ki shithi thung kam thok kiba don ki jingbakla spel kiba paw bha ki la pynpaw pyrthei ïa ka jingkynnoh ba la leh thok ha ka kam kaba la pynlut ksan ïa ki 6 ngut ki nongwad kam lajan T. 8 lak.
Ki pulit ki la ïathuh ba une uba la shah kynnoh u dei uba la tip kyrteng kum u Rishi Kumar Yadav 38 snem ka rta uba na Jhansi ha Uttar Pradesh bad u la sah ha ka thaiñ MP Nagar jong ka Bhopal la kumba saw bnai eiei.
U la kam ba u bat tang ïa ka kyrdan M.Tech Degree na ka Engineering College ha Jhansi. La kynnoh ba u la pynithuh ïalade kum u ophisar IPS ha ka por ba u leit sha ka tnad Income Tax bad u la kam ba u dei u Assistant Investigation Officer.
Ka thong jong u ka long ban thmu pynngop ïa ka kynhun ki samla kiba pynkhreh ïa ki eksamin UPSC.
Katkum ka jingïathuh jong ki pulit jong ka MP Nagar, u Yadav u la ïakynduh ïa u Devanshu Verma uba kwah ban long kam sorkar ha kawei ka cafe ha ka Zone-2 ha u bnai Ïaïong. La kynnoh ba u la ong ha u Devanshu bad san ngut ki paralok ba u lah ban pynbiang kam ïa ki ha ka kynhun tohkit Income Tax ha ka dor kaba mar T.1 lak.
La ïathuh ba u la kular ïa ka tulop kaba nyngkong kaba long T.25,000 ha ka por ba u don ha ka jingshah pyntbit, bad kan kiew sha ka T.72,000 hadien 11 bnai, ha kaba ki jingthung kam kin long kiba neh.
Haba katto katne na ki nongthmu ki la ïaleh ban pynbeit ïa ka pisa, la ong ki pulit, la kynnoh ba u Yadav u la pynshlur ïa ki ban shim ram, da kaba pynthikna ïa ki ba ïa ka jingsiew lah ban siew na ka tulop jong ki na ka bynta ka ban sa wan.
Katkum ka jingong jong ki pulit MP Nagar, ki hynriew ngut ki nongwad kam ki la siew ïa u ha kaba kut ha ki bynta.
La kynnoh ba u Yadav u la bteng ban dawa pisa kiba kham rit na ka bynta ka leit ka wan, ka bam, ka jingleit kai bad kiwei kiwei ki jinglut, kaba la pynpoi ïa ka pisa baroh kumba T. 8 lak.
Ban pynskhem ïa ka jingkynnoh thok jong u, ki pulit ki la ong ba u la shna ïa ka Official Identity Card thok da kaba pyndonkam da ka mobile phone bad ka MS Office hadien ba u la download ïa ka card ka barim na ka internet. La kynnoh ruh ba ka kurim jong u ka dei ka ophisar IPS kaba la buh ha ka tnad Excise jong ka Delhi, watla ki pulit ki la ong ba ha ka jingshisha ka dei ka nongtrei ïing.
