Mumbai, Nailur:
Ki la don palat 2.06 klur ngut ki nongthep vote, lane 21.14% na ki nongthep vote jong ka Maharashtra, kiba la shah kyntait noh ha ka Draft Electoral Roll hadien ba la pynlong ïa ka Special Intensive Revision (SIR), ong ka ophis jong u Chief Electoral Officer.
Shuwa ban pynlong ïa ka SIR, ka Maharashtra ka don 9,78,54,049 ngut ki nongthep vote kiba la pynrung kyrteng. Na kitei, ki don 7,71,65,562, kata 78.86 percent, kiba la shah pynrung ha ka Draft Electoral Roll, katba ki don 2,06,88,487 ngut ki nongthep vote, kata 21.14% kiba la shah kynthup.
Ka Draft Roll ka kynthup ïa 3,95,89,905 ngut ki nongthep vote shynrang, 3,75,72,570 ngut ki kynthei bad 3,087 ngut kiba don ïa ka jinglong kynthei bad shynrang, kane ka long katkum ka jingong ka khubor jong ki bor pynïaid elekshon ka jylla.Ïa ki phorm jingkheiñ briew jong ki 2,06,88,487 ngut ym shym la lah ban lum namar ba kim don ne ym lah ban lap ïa ki ha ki jaka ba ki la pynrung kyrteng, ki la kynriah, ki la khlad noh, ki la pynrung kyrteng shawei pat ne ki don arsien ki jingthoh. Ka kyrdan ka kynthup ruh ïa ki nongthep vote kiba la kyntait ban pyndap bad aiti ïa ka phorm jingkheiñ briew.
