Itanagar, Nailur:
Ka Arunachal Pradesh Congress Committee (APCC) ha ka sngi Balang, ka 2 tarik, Nailur, ka la pynlong ïa ka jingïaid paidbah ha Itanagar, da kaba dawa ban weng noh ïa ka jingujor ejahar ba la mudui pyrshah ïa u Nongïalam ka Liang Pyrshah ha Lok Sabha, u Rahul Gandhi, halor ka jingkren jong u, halor ka jingleh niam ‘purification’ kaba la kynnoh ba la pynshong nongrim ha Uttarakhand.
Kane ka jingïaid paidbah ka la sdang na Rajiv Gandhi Bhawan bad la ïashim bynta da ki nongïalam ka Congress, ki nongkitkam, ki nongmihkhmat ba la jied, ki nongtrei ka seng bad ki nongkyrshan.
Haba kren sha ki lad pathai khubor ha kane ka jingïakhih, ka vice president ka APCC ka Mina Toko, General Secretary ka Kipa Kaha, Secretary bad nongaiktien u Johny Yangfo bad General Secretary u Kon Jirjo Jotham ki la kynthoh ïa ka ejahar pyrshah ïa u Gandhi.
Ka Congress ka la kynnoh ba katei ka mukotduma ka dei ka jingthmu ban pynsngap jar ïa ka Liang Pyrshah bad ka la kynnoh ba ka BJP-RSS ka kyntiew ïa ka jingsngewpher jaitbynriew, ka jingbym lah ban ktah bad ka jingleh shiliang khmat.
Kane ka jingïakynad ka ïadei bad ka ‘Shuddhikaran Havan’ ba la kynnoh ba la pynlong ha Ramlila Maidan ha Haldwani, Nainital, ha ka 10 tarik u Nailar, ar sngi hadien ba u President ka Congress, u Mallikarjun Kharge, u la ai jingkren ha ka ‘Vijay Shankhnaad Rally’ ha kajuh ka jaka kum shi bynta jong ka jingpynkhreh jong ka seng na ka bynta ka Uttarakhand Assembly Elections 2027.
Katkum ka jingïathuh jong ka APCC, ki dkhot jong ka Shri Ram Sena Dharmarth Seva Nyas Sangathan ki la pynlong ïa kane ka jingleh niam ha katei ka jaka, kynthup ruh ha ka rynsan kaba la pyndonkam da u Kharge.
Hadien kata u Kharge u la rah ïa kane ka mat ha Rajya Sabha ha ka 13 tarik u Nailar, da kaba ong ba katei ka jinglehniam ka la pynjah burom ïa u bad u la dawa ban pyntreikam da ka aiñ.
U Myntri ka sorkar pdeng u J P Nadda, katkum ka jingong jong ka Congress, u la ong ba ka BJP kam kyrshan ïa kum kine ki kam bad u la pynthikna ba ïa kane ka kam yn sa tohkit.
Ha ka 29 tarik u Nailar, u Gandhi u la pan ban ujor da ka ejahar pyrshah ïa kito kiba donkti bad u la dawa ban leh eiei katkum ka aiñ Scheduled Castes and Scheduled Tribes (Prevention of Atrocities) Act. U la batai ïa katei ka jingjia kum ka nuksa jong ka jingbym lah ban ktah bad ka jingshah lehbeiñ.
La ujor ejahar pyrshah ïa u Gandhi ha ka sngi kaba bud halor katei ka jingkren jong u.
Ka Congress ka la kynnoh ba katei ka jinglehniam pynkhuid ka don jingïadei bad ka jinglong jong u Kharge kum u nongïalam Dalit. Hynrei ka BJP bad ki nongpynïaid ïa katei ka jinglehniam, ki la kyntait ba ka don kano kano ka jingthmu jong ka jaitbynriew ne ka jingïadei bad ka BJP.
Ka APCC ha ka sngi Balang ka la dawa ban weng noh ïa ka ejahar pyrshah ïa u Gandhi bad ka la pan ïa ka jingtohkit kaba khlem liang bad kaba buh por halor katei ka jingleh niam pynkhuid kaba la kynnoh.
Ka seng ka la khot ruh ban pynkut noh ïa ka jingsngewpher jaitbynriew, ka jingbym lah ban ktah bad ka jingshah kyntait ha ka imlang sahlang, da kaba pynskhem ba ka Riti Synshar ka ai ïa ka jingïaryngkat, ka burom bad ka jingïada na ka jingshah lehbeiñ.
“Kane kam dei tang ka mat jong ka Congress pyrshah ïa ka BJP. Kane ka dei ka jingkylli hato ka Riti Synshar kan jop ne em ïa ka bor saiñ pyrthei”, la ong ka seng.
Ka Congress, ka la ong ba kan dang bteng ïa ka jingïalap pyrshah ïa ka jingsngewpher jaitbynriew, ka jingbym lah ban ktah kti, ka jingshah lehbeiñ bad ïa kaei kaba ka khot ka jingïakynad kam saiñ pyrthei, katba ka pynpaw ïa ka jingïatylli bad u Gandhi bad u Kharge.
