Bhubaneswar, Nailur:
Ka seng BJD ha ka sngi Balang ka la kyntu ïa u heh ophisar elekshon ban shimkhia mardor halor ka jingkynnoh ba la pyndonkam bakla ïa ka Form-7 ban pyndam noh ïa ki kyrteng jong ki nongjied ba shisha bad kiba dei hok, khamtam eh jong ki jaitbynriew rit paid, ha ka por ba dang ïaid shakhmat ïa ka Special Intensive Revision (SIR).
Ha ka jingthoh jingkynmaw ba la ai sha u heh ophisar ba la pyndap, ka BJD Minority Cell ka la kynnoh ba la ïoh jingujor halor ka jingthep Form-7 pyrshah ïa ki nongjied ba shisha, khamtam ki Muslim, ki Khristan, ki Buddhist napdeng ki nongshong shnong kiba dei hok.
Ka dorkhas ka la ong ba namar ba ka por dawa bad jingpyrshah hapoh ka SIR ka la kut ha ka 19 tarik u Nailar, dei ban bud ïa ka rukom treikam aiñ ba la buh bad ym dei ban pynduh ïa u nongjied ba shisha. Shuwa ban pyndam ïa kano kano ka kyrteng, dei ban pyntip sha u nongjied ba ïadei bad dei ban ailad ban pyni ïa ka mukotduma jong u, ka la bynrap.
Ka seng ka la dawa ba ki aplikeshon Form-7 bad ki jingtyrwa ban pyndam kiba dang pyntreikam hadien ka 19 tarik u Nailar, ki dei ban shah bishar bniah kyrpang. Ka jingpynshisha katkum ki konstitwensi bad katkum ki booth jong ki aplikeshon Form-7 dei ban leh ha ki jaka ba don bun ki jaitbynriew rit paid, ka la bynrap.
Ka BJD ka la kyntu ïa u CEO ba un bishar bniah ïa kane ka kam bad bthah ïa baroh ki DEO bad ki ERO ha ka jylla ba kin pynlong ïa ka jingpynshisha khlem shah liang ha kano kano ka jaka ba ki ïoh jingujor.
Ha kane ka kynhun jong ka BJD la kynthup ïa ki nongïalam ba rangbah u Sheikh Nizamuddin, ka Rizwana Begum, ka Susanta Rout, u Lenin Mohanty bad u Bijay Nayak, nalor kiwei pat.
