Kolkata, Nailur:
Kum shi bynta ban pynpaw ïa ka jingsngewkhia kaba jur halor ka jinglong jingman jong ka suk ka saiñ ha West Bengal kaba la synshar da ka BJP, ka kynhun jong ka Trinamool Congress ba la ïalam da ka Myntri Rangbah barim ka jylla ka Mamata Banerjee ha ka sngi Palei ka la thoh sha ka President ka Droupadi Murmu bad sha u Lat ka jylla u R N Ravi, da kaba pan jingïalang kyrpang bad ki.
Kine ki shithi ki la wan hadien katto katne kynta hadien ba u MP jong ka seng u Abhishek Banerjee u la kynnoh ba ki nongtrei ka seng synshar ki la pynjulor ïa ka ophis jong ka TMC kaba don ha Camac Street ha ka step jong ka sngi Palei.
Ka seng synshar barim, ka Trinamool Congress, ka la kynnoh ïa ka jinglong jingman jong ka suk ka saiñ kaba ‘nang sniew’ ha West Bengal naduh ba ka BJP ka la wan ha ka bor synshar ha katei ka jylla ha u bnai Jymmang.
Ki nongïalam jong ka Trinamool Congress kiba dei na ka ktem jong ka Mamata Banerjee ki thmu ban ïakynduh ïa ka Murmu bad u Ravi ban pynsngew ia ki jingkynnoh jong ki ha kaba ïadei bad ka jinglong jingman jong ka aiñ bad ka suk ka saiñ kaba la ‘sniew’ ha West Bengal, khamtam hadien ba la pynkylla ïa ki nongap pahara ha katei ka jylla.
Katkum ka jingong jong ki briew kiba don hapoh ka seng ha ka ktem jong ka Mamata Banerjee, ki kwah ban pynkhih ïa ka jingmut jong baroh arngut u President bad u Lat, ki arngut ki khlieh nongsynshar jong ka ri bad ka jylla kawei hadien kawei pat, shaphang ka jinglong jingman jong ka aiñ bad ka jingkynnoh ba ki pulit ha ka jylla ki long kiba heh kti.
Ki la kynnoh ruh ba ki nongtrei ka BJP ki ju kawang maw bad kawang pylleng ïa ki nongïalam barim jong ka seng kaba bat ïa ka jingsynshar, kiba kynthup ïa ka Mamata Banerjee, u Abhishek Banerjee, u Sougata Roy, u Mahua Moitra bad kiwei kiwei, ha ki jingjia bapher bapher ha kylleng ka Jylla.
Hynnin ka sngi, u Abhishek, ula kynnoh ba kitei ki nongthombor, kiba u la batai kum ki “riew pyntriem jong ka BJP, kiba don ki tiar ïaleh”, ki la thombor ïa ki briew hapoh ka ophis kaba don ha Camac Street, ki la knieh ïa ki phone, ki la pynpra ïa ki tiar ki tar bad ki la pynjot ïa ki tiar Electronic.
U la sam ruh ïa ki dur CCTV bad ki video kiba la kynnoh ba ki pyni ïa ka jingjia hadien katei ka jingjia. Ki dur CCTV ba la sam da u Abhishek la kynnoh ba ki pyni ïa ki briew kiba deng mask hapoh katei ka jaka kiba rah ïa ki screen telebishon bad kiwei kiwei ki tiar electronic shabar jong ka ophis.
Haba pynsaphriang ïa ka video, une u MP ka Trinamool Congress na Diamond Harbor u la thoh ha ka rynsan X, “Ha ka por kumba 4.30 baje mynstep, ki riew shim kabu jong ka BJP, kiba kieng atiar, ki la hiar thma ïa ki briew jong ngi, ki la knieh ïa ki phone jong ki, ki la pynpait ïa ki tiar ki tar, ki la lute ïa ki tiar elektrik bad ki la pynpra ïa ki jaka treikam.”
U Abhishek u la kynnoh ïa ki pulit jong ka Kolkata ba kim shym la jubab satia haduh jan ar kynta wat hapdeng ka jingkhot bad phah email bunsien na ki nongtrei jong ka TMC bad ki nongïasaid aiñ.
“Bad hangno ki pulit Kolkata ki la don? Haduh ar kynta, wat hapdeng ba la phone bad email bunsien na ki briew bad ki nongïasaid aiñ jong ngi, ym shym la don kano kano ka jingkynthoh. Kane ka long kaba sngewsih bad kaba ym lah ban pdiang”, u la ong ha ka rynsan X.
“Ngi dawa ban kem mardor ïa uwei pa uwei u briew uba donkti ha kane ka kam thombor. Ngi dawa ruh ban tohkit mano ba thmu, pynbeit bad bthah ïa kane ka kam thombor, bad balei ki pulit kim shym la leh ei ei watla la pyntip bunsien. Ym don ka seng saiñ pyrthei bad kano kano ka kynhun jong ki nongleh kam sniew kiba don tiar kiba lah ban long halor ka aiñ,” bynrap biang u khun kha jong kaMamata.
U la buh jingkylli shuh shuh ïa ka jinglong jingman jong ka suk ka saiñ ha Bengal, da kaba ong, “Lada ki briew ki lah ban hiar thma ïa ka ophis jong ka seng saiñ pyrthei da ki tiar ïaleh ha ka por 4.30 mynstep, ban thombor ïa ki briew bad ban pynjulor ïa ki mar ki mata katba ki pulit ki dang don, te kaei thik kaba sah jong ka synshar aiñ ha West Bengal?” “Ka la biang. Kem ïa ki nongleh kam sniew. Pynbeit ïa ka jingkitkhlieh. To leh mynta.”
Ha ka janmiet jong ka 27 tarik u Nailar, ka Kolkata Municipal Corporation (KMC) ryngkat bad ki pulit jong ka Kolkata, ki la pynpra ïa kawei ka billboard kaba heh bha jong ka All India Trinamool Congress (AITC) kaba la buh ha jrong jong ka ophis jong u Abhishek ha ka mala kaba hynriew jong kawei ka ïing kaba bun mala bha ha Camac Street, lait noh ma u, ha ryngkat ki pulit pahara ba shimet jong u, la ong u nongtrei ophis bad u Derek O’Brien, da kaba khanglad ïa ka kynhun jong ki paidbah bad ki pulit ban rung shapoh katei ka ïing.
Ki nongtrei jong ka KMC kiba la tiar da ki nar bad ki tiar ot gas ki la sdang ïa ka jingtrei ban pynpra ïa katei ka billboard, kaba la shna da ki sla tin halor ka jingtei kaba la shna da ki nar.
