Imphal, Nailur:
Ki la don kumba 306 ngut ki briew kiba la ïap, bad 49 ngut ki dang jah rngai ha ka jingshah thombor hapdeng ki jaitbynriew kaba la ktah ïa ka jylla Manipur naduh u bnai Jymmang 2023, ong u Myntri ka tnat ki kam pohïing ka jylla u Govindas Konthoujam ha ka ïing dorbar ha ka 3 tarik Nailur.
U Konthoujam u la ai ïa kine ki jingkheiñ haba jubab ïa ka jingkylli na u MLA ka BJP u Sapam Ranjan Singh ha ka sngi kaba ar jong ka dorbar thawaiñ kaba dang ïaid shakhmat.
U la ong ba ïa ki jingkheiñ la buh haduh ka 31 tarik jong u bnai Nailar, 2026.
Ka jingïakynad hapdeng ki jaitbynriew Meitei bad Kuki-Zo, ka la sdang naduh ka 3 tarik Jymmang, 2023, hadien ka jingïaid paidbah jong ka Tribal Solidarity March, kaba la pynlong ha ki jaka lum jong ka Manipur.
Ïa kane ka jingïaid paidbah la pynlong ban pyrshah ïa ka jingdawa ïa ka kyrdan Scheduled Tribe ïa ka jaitbynriew Meitei.
Ki Meitei ki don kumba 53 percent na ka jingbun briew jong ka Manipur bad ki bun bha ha ka them Imphal. Ki riewlum, kynthup ïa ki Naga bad ki Kuki, ki don kumba 40 percent na ka jingbun briew bad ki kham bun ki shong ha ki distrik ha ki jaka lum.
Ka jingïaleh kaba la slem bha ka la wanrah ruh ïa ka jingkylla ha ka synshar khadar jong ka jylla. Ka jingsynshar President ka la pynjari ha ka 13 tarik, Rymphang, 2025, hadien ba ka sorkar ba ïalam da ka BJP ba la khlieh da u N Biren Singh ka la iehnoh kam ha ka 9 tarik, Rymphang hapdeng ka jingïakhih jaitbynriew kaba dang ïai bteng.
Ka dorbar jong ka Manipur, kaba don 60 ngut ki dkhot, kaba ka samoi treikam jong ka, kan neh haduh u snem 2027, la buh hapoh ka Suspended Animation, hadien ba la pynjari ïa ka jingsynshar President.
La weng noh ïa ka jingsynshar President ha ka 4 tarik, Rymphang, 2026, kaba la plie lad ban thaw ïa ka sorkar kaba thymmai kaba la ïalam da u nongïalam ka BJP, u Yumnam Khemchand Singh kum u Myntri Rangbah.
