Chennai, Nailur:
Kum ka jingwanrah ha ka miej ïakren halor ka jingduna palat jong ki pulit ha ka tnat pulit, u Myntri Rangbah ka jylla Tamil Nadu u Vijay ha ka sngi Palei u la pynbna ïa ki lad ki lynti kiba bun, kynthup ïa ka jingthaw ïa ki 29,108 tylli ki kam thymmai ha kine ki san snem ban wan.
Ha kane ka snem yn pynrung kam haduh 10 hajar ngut ki pulit, ha kaba shiteng na ki ki dei ki kynthei, yn thung kam mynta u snem, la ong u Myntri Rangbah. “Ka sorkar jylla kan pynkiew ïa ka jingmihkhmat jong ki kynthei ha ka tnat pulit na ka 22% kaba mynta sha ka 30%”, la bynrap biang u Vijay.
Haba pynpaw ïa ka jingdonkam ban weng ïa ki kam runar pyrshah ïa ki kynthei bad ka jingma ïa u drok, u Myntri Rangbah u la ong ba ki kam thymmai kin kynthup ïa ki kam ha ka Singappen Special Task Force bad ka Anti-Narcotics Force.
U Myntri Rangbah u la pynbna ïa kine ki jingpynbna haba wanrah ïa ka jingdawa ban ai da ka jingkyrshan na ka bynta ka tnad kam pohïing hapoh ka ïingdorbar thawai.
Ka tnat pulit kan long kaba thymmai namar ba ka jylla ka thmu ban pynlut T.212 klur ha ka AI Digital Forensics, ka jingpeitngor ha ka por ba shisha, ki lad pyntip kiba mynta bad ki jaka ai hukum, la ong u Myntri Rangbah.
Ïa ka pisa ba kyrkieh ba la ai sha ki thanat pulit ruh yn pynkiew bha. Katkum ka jingpynïapher jong ki, yn pynkiew ïa ka mang tyngka na ka T.3,750, T.6,000 bad T.8,250 sha ka T.30,000, T.40,000 bad T.50,000, la bynrap biang u Vijay.
Ka sorkar ka la pynbna ruh ban pynkiew ïa ka bai lutksan na ka bynta ki pulit bad ki bahaïing jong ki. Ki longïing jong ki briew, kiba ïap ha ka kamram katba ki dang pyni ïa ka jingshlur kaba kyrpang, kin ïoh T.1 klur tyngka. Ïa ka jingsiew shuh shuh na ka bynta ki briew kiba ïap, kiba don jingduna ha ki dkhot met lane kiba mynsaw katba ki dang shakri yn pynkiew na ka T.20 lak sha ka T.30 lak.
Ban kyntiew ïa ki shnong kiba lait na u drok, ka sorkar kan jied 50 tylli ki shnong man la u snem bad kan ai khusnam T.10 lak kawei kawei na ka bynta ban pynroi ïa ki jingtei hapoh ka skhim ba kyrpang.
U Myntri Rangbah u la pynbna ruh ïa ki lad ki lynti ban pynkhlaiñ ïa ki bor wad bniah.
Ar tylli ki jaka test DNA ba thymmai yn thaw ha ki jaka test DNA jong ka thaiñ ha Salem bad Villupuram ha ka jinglut kaba la antad kumba 14 klur tyngka.
Ki Cyber-Forensic Division yn thaw ha Salem bad ha Tirunelveli ha ka dor kaba T.18.73 klur. Kane ka Ballistic Division ka Chennai Forensic Laboratory ka pynbiang ïa ka Automated Ballistic Identification System ha ka jinglut ba T.2.5 klur.
Ha ka tnad pynlip ding bad pynlait im, yn pynkylla ïa ka kyrteng ‘Fireman’ sha ka ‘Firefighter’. Yn pynrung ïa ki kynthei ha ka kynhun shipai ban pynthikna ïa ka jingïashim bynta kaba kham bun bad ban ai jingïarap kyrpang ha ka por ba don ki kam pynlait im kiba kynthup ïa ki kynthei bad ki khynnah, la ong u Myntri Rangbah.
Ïa kane ka tnad yn pynbiang ruh da ki 50 tylli ki Scuba Suit, 25 tylli ki drone ban peitngor bad 10 tylli ki drone kiba kit ïa ki Payload ha ka jinglut baroh kan long T.4.20 klur. Yn thied san tylli ki kor Compressor na ka bynta ban ring bad pynhiar mynsiem ha ka jinglut kaba T. 65 lak.
Yn thaw haduh 10 tylli ki kynhun peit bniah ïa ka jingshngaiñ na ka jingpluh ha ka jinglut kaba T. 3.20 klur.
Ka jingdon jong ki takma CM’s Fire Service Medal ba la ai ha ka sngi Pongal kan long ar shah na ka 120 sha ka 240. Ïa ka bynta jong ka pisa jong kane ka khusnam yn pynkiew ruh na ka T.400 sha ka T.500.
