Patna, Nailur:
Ka Bihar, ka dang don ha ka jingmaham halor ka jingshlei um, namar ba ka wah Ganga, ka dang bteng ban kiew, ha kaba ka jingheh jong ka um, ka lah ban ïaid palat ïa ka dak jong ka jingshlei um kaba heh tam ha Gandhi Ghat bad Hathidah ha Patna, ha ka sngi Palei.
U heh jong ka tnad pynïaid ïa ki jingjia ba sngewsih jong ka jylla u la ong ba katto katne ki wah ki don ha ka jingshlei um bad 13 tylli ki distrik ki ïakynduh ïa ka jingma jong ka jingshlei um.
Ha Patna, ka wah Ganga, ka tuid sawdong ar phut shajrong jong ka dak jingma, ha kaba ka um, ka poi haduh kjat, sha ki lynti shakri, hajan ka Bhadraghat bad ka Mahavir Ghat. Ka um ka la khmih lynti ruh ba kan pynkheiñ ïa ka jingshlei um kaba heh tam ha Hathidah ha Mokama ha ka por shiteng sngi ha ka sngi Thohdieng, la ong u heh sorkar.
Ha kajuh ka por, u Myntri Rangbah ka jylla u Samrat Choudhary u la jurip ïa ka jingkiew jong ka um jong ka wah Ganga bad u la bthah ïa ki ophisar ba kin shim ïa baroh ki lad ki lynti ban ïada ïa ki jingim bad ki mar ki mata bad ban ïada na ka jingpynjynjar ïa ki briew lada jia ba wan ka jingshlei um.
Ka tnat peitngor jong ka jylla, ka la pyntip sha ki nongshong shnong kiba sah harud ki rud wah bad ha ki jaka ba kham rit jong ka distrik Bhojpur, Patna, Saran, Vaishali, Nalanda, Begusarai, Lakhisarai bad Jehanabad.
Kumjuh ruh baroh 69 tylli ki khyrdop jong ka Indrapuri barrage ha Rohtas la plie, kaba la pyllait ïa ka um kaba 5.16 lak cusec sha ka wah Sone, kaba la wanrah ïa ka jingsyier halor ka jingshlei um ha ki jaka ba kham rit.
Ha kawei pat ka liang, ka surok NH-319A, kaba dei ka surok Buxar-Mohania National Highway, ka la shah rong ha ka um ha Buxar.
Ki wahduid ha Kaimur, kiba kynthup ïa ka Telhar Kund, Karkatgarh bad Bansi Khoh, ki don ruh ha ka jingap jingma.
U Symbud Myntri Rangbah ka jylla u Vijay Kumar Chaudhary u la bishar bniah ïa ka jinglong jingman jong ka jingshlei um na ka Command and Control Centre jong ka Water Resources Department lyngba ka jingïakren ha ka Video. U la bishar bniah ïa ki jinglong jingman jong ki jingker um bad ki kam pynlait im, khamtam ha Bhagalpur, ha kaba la pynpra ïa kawei ka jingker um.
Haba kynthoh pyrshah ïa ka sorkar jylla, u nongïalam ka RJD u Tejashwi Prasad Yadav u la ong, “Palat 15 tylli ki distrik ki don ha ka jingshah ktah ha ka jingshlei um, hynrei ka sorkar NDA kam pat pynkhreh ha ka kyrdan synshar na ka bynta ban ïada na ka jingshlei um bad ki jingïarap. Ka sorkar kam shym la pynkhreh haduh mynta na ka bynta ban ai jingïada sha ki riewpaidbah ne sha kito kiba shah ktah na ka jingshlei um. Ne kam pat pynlong kano kano ka jingpynsngewthuh paidbah shaphang kane. Na ka daw jong ka jingjur ki jingthombor ki bor ka mariang bad ki jingtwa khyndew na ka jingshlei um ha ki la pynlong ïa ka jingpynsngewthuh paidbah namar ka jingshah pynjulor bad ka jingshlei um ha ki thaiñ ba don jaka tep, ki jingthung kum u riewhadem, bad ki jhur jyrngam ki la shah tap ha ka um.”
