Agartala, Nailur:
Ki hynñiew tylli ki kynhun kieng atiar ha Tripura, ki la pynlong ïa ka jingkhang dam kaba 72 kynta ïa ka surok bah Assam-Agartala National Highway ha ka 4 tarik Nailur, kaba la pynthut ïa ka leit ka wan bad dawa ban leh eiei halor ki 11 tylli ki mat, kynthup ïa ka jingpyntreikam ïa ka jingïateh kular jong ki lailiang mamla, kaba la ïasoi ha u Naitung jong u snem 2024.
Ki dkhot bad ki nongkyrshan jong ka National Liberation Front of Tripura (Original), NLFT (Parimal Debbarma), All Tripura Tiger Force (ATTF), NLFT (Nayan Bashi), Joint Action Rehabilitation Committee, Joint Action Committee bad ATTF (Old) ki la sdang ïa ka pakhang shnong naduh mynstep ha ka thaiñ Baramura jong ka Chandra Sadhuapada.
Ki nongïakhih ki la buh ïalade ha ka surok bah bad ki la thang ïa ki tyndong kali, kaba la pynsangeh ïa ka jingleit jingwan. Ki kali ki la sahkut ha ki katto katne ki jaka namar ba ka jingkhang ka la ktah ïa kawei na ki surok ba kongsan jong ka jylla.
Ïa kane ka jingïakhih la ïathuh ruh ha Bighudas ha shi lynter ka lynti rel bad ha Khowai Chowmuhani ha ka lynti surok.
La pynkhlaiñ bha ïa ka jingpahara ha ki jaka ba shah ktah, katba ki pulit bad ki heh sorkar ki la pynlong ïa ka jingïakren bad ki nongïakhih ha ka jingpyrshang ban pynkhuid ïa ki lynti ïaid.
U Superintendent jong ki pulit jong ka West Tripura, u Namit Pathak, u la poi sha katei ka jaka jong ka jingïakhih, hadien ba u la ïoh jingtip halor katei ka pakhang shnong.
U nongïalam ka NLFT u Thomas Tripura u la ong ba ki sengbhalang ki la dawa ban pyntreikam ïa ki jingkular ba la leh katkum ki jingïateh kular bad ka sorkar pdeng bad ka sorkar Tripura la katto katne snem mynta. U la kynnoh ba ka jingïateh lailiang jong ka 4 tarik u Nailur, 2024 ka ai por saw snem, kaba kut ha u snem 2028, na ka bynta ban pyntreikam ïa ki jingkular.
Katkum ka jingong u Thomas Tripura, ki kynhun ki ngeit ba kam shym la don ka jingkiew kaba biang haduh mynta bad kumta ki la pynjur shuh shuh ïa ka jingïakhih jong ki.
“Ngi la ïaleh haduh 35 snem kum ka seng kaba pynkylla dur,” u la ong bad bynrap ba katto katne ki seng hadien ki la wanphai biang sha ka lynti kaba kongsan lyngba ki jingïateh kular bad ki sorkar.
Ki jingdawa jong ki kynhun ki kynthup ïa ka jingïada ïa ki nongïalam bad ki shipai jong ki, ka jingithuh bad jingpynrung ïa ka thup jong ki shipai kiba wanphai, bad ban pyntreikam mardor ïa ka jingïateh kular ha ka 4 tarik u Nailur, 2024.
Ki wad ruh ban pyndap ïa ki kam ba lait jong ki Scheduled Tribe kiba dang sahteng, ban weng noh ïa ki mukotduma jong ki pulit pyrshah ïa ki Returnee Cadre bad ban pyntreikam ïa ki projek hapoh ka Socio-Economic Development Package (SEDP), kynthup ïa ki projek kiba ïadei bad ki jaka jong ki riew shimet bad ki nongïoh jingmyntoi shimet.
Katto katne ki jingdawa ki ïadei bad ki trai ri trai muluk ha Tripura. Ki sengbhalang ki la khot ïa ki lad jingïada na ka bynta ka khyndew ka shyiap jong ki Tiprasa, ka jingsynshar ba kyrpang bad ka jingpdiang bad pyntreikam ïa ka dak Roman na ka bynta ka Kokborok.
Ki la dawa ruh ïa ka Common Customary Law na ka bynta ki jaitbynriew Tiprasa, ban pynïoh biang bad pynkylla kyrteng thymmai ïa ki kyrteng shnong tynrai, bad ban aiti noh ïa ki bor kiba ïadei bad ka jingshim jaka bad ai jaka sha ka Tripura Tribal Areas Autonomous District Council (TTAADC).
U Thomas Tripura u la ong ba kane ka pakhang shnong kan bteng haduh 72 kynta lymda ki bor ba dei peit kin shimkhia ïa ki jingeh ba la wanrah da ki kynhun.
Ki sengbhalang ki la pynbna ïa ka jingkhang dam ha ka jylla baroh kawei kham mynshwa, kaba sdang naduh ka por 6 baje mynstep jong ka 4 tarik u Nailur, kum ka jingïakhih lang jong ki kynhun ba wanphai jong ka NLFT bad ATTF.
Ki la batai ïa katei ka jingleh kum ka jingïakhih jong ka synshar paidbah kaba thmu ban pynthikna ïa ka jingpyntreikam ïa ka jingïateh kular bad ban ïada ïa ki jingmyntoi jong ki lehnoh barim.
