Guwahati, Nailur:
U MLA ka Sivasagar bad u heh ka Raijor Dal u Akhil Gogoi ha ka sngi Ba-ar, kata ha ka 1 tarik, Nailur u la pynbna ïa ka jingïakhih kaba thymmai ha Assam halor ki lad jingïarap na ka jingshlei um, da kaba kynnoh ba ka jingïakynduh jong u bad u Myntri Rangbah ka jylla u Himanta Biswa Sarma kam shym la lah ban ai kano kano ka jingpynthikna kaba skhem halor ka jingpynkylla ïa ki lad jingïarap jong ka jylla.
U Gogoi u la ïathuh ba u la ïakynduh ïa u Myntri Rangbah ha ka lah sngi U Blei bad aiti ruh ïa ka dorkhas ban pan jingkylla ha ka kot ai jingïarap jong ka Assam State Disaster Management Authority (ASDMA) kaba la don lypa. Katkum ka jingong jong u, ki kyndon kiba mynta kim pynpaw bha ïa ka jingduhnong kaba la mad da ki longïing kiba shah ktah ha ka jingshlei um.
U la kdew ïa ka bai lutksan kaba la don lypa kaba long T.3 lak lada jia ba ïap bad u la ong ba ki jingpynbeit na ka bynta kiba mynsaw jur, ki ïing kiba shah pynjulor, ki tiar ïing, ki jaka rep bad ki pung ruh kim biang.
“Ka mat ba kongsan ka la pulom. Kumta ngi la pynbna biang ïa ka jingïakhih kaba pynshong nongrim ha ka jingshlei um”, la ong u Gogoi.
Kum shi bynta jong ka jingïakhih, u Gogoi u la pynbna ïa ka jingïalang paidbah ha Nazira ha ka 6 tarik u Nailur. Naduh ka 7 tarik u Nailur haduh ka 16 tarik u Nailur, ki dkhot jong ka seng jong u kin leit jngoh ïa ki jaka ba shah ktah ha ka jingshlei um ha kylleng ka Assam ban bishar bniah ïa ka jinglong jingman bad ban ïakynduh bad ki nongshong shnong kiba shah ktah. Hadien kane yn pynlong ïa ka jingïalang paidbah kaba heh ha Guwahati.
U Gogoi u la pynbna ruh ïa ka jingthmu ban ïakhih ha ophis jong u Myntri Rangbah ha ka 16 tarik u Nailur. Ka jingïakhih kan long nyngkong eh halor ka jingdawa ïa ka jingïarap pisa kaba T.10 lak na ka bynta kawei pa kawei ka longïing kaba shah ktah ha ka jingshlei um.
U Gogoi u la buh jingkylli ïa ka jingbiang jong ki katto katne ki kyndon hapoh ka kot ai jingïarap jong ka ASDMA. U la ong ba ki longïing kiba duh ïa ki jaiñ, ki jingkup thiah bad kiwei kiwei ki tiar ïing ki don hok ban ïoh T.2,500, katba sa T.2,500 la ai sha ka jingduh ïa ki tiar shet tiar tiew.
U la buh jingkylli ruh ïa ka bai lutksan kaba lah ban ïoh na ka bynta ki ïing pucca kiba la shah pynjulor pura, da kaba kynthoh ba katei ka pisa kam ïahap bad ka jinglut jingsep kaba mynta.
U la ong ba ki jaka rep ba la ai um ruh kumjuh ki shah ktah ha ka jingsiew bai lutksan kaba rit.
U Gogoi u la kdew shuh shuh ïa ka jingsiew bai lutksan kaba lah ban ïoh na ka bynta ki pung kiba la shah pynjulor, da kaba kynnoh ba ka pung kaba la saphriang haduh 7.5 bighas ka jaka ka lah ban ïoh tang 7 hajar tyngka katkum ki kyndon kiba la don lypa.
U la ong ba donkam ban pynkylla thymmai ïa ka kot ai jingïarap khnang ban pynthikna ba ki jingïarap ba la ai sha ki longïing kiba shah ktah ha ka jingshah pynjulor kin ïadei bad ka jingduhnong kaba ki la mad.
U Gogoi u la pynpaw ruh ïa ka jingsngewkhia halor ka jingduhnong jong ki kam khaïi ha ka por ba jur ka jingshlei um, khamtam ha Sivasagar.
U la kynnoh ba katto katne ki dukan bad ki jaka treikam ki la mad ïa ka jingduhnong kaba la poi sha ki klur tyngka bad ba don ruh ki bym don jingïada.
Katkum ka jingong u Gogoi, u la pynpaw ïa katei ka mat ha ka jingïakynduh jong u bad u Myntri Rangbah ka jylla bad pan jingkylla ha ki kyndon ai jingïarap.
U la kynnoh ba u Sarma u la ong ïa u ba ki dukan kiba treikam khlem Insurance ki leh ïa kaba beaiñ.
U Gogoi u la pan ruh ïa ka bai lutksan kaba kham heh na ka bynta ki kali kiba la shah pynjulor ha ka jingshlei um, da kaba ong ba ka jingbym don kano kano ka jingpynthikna halor ka jingpynkylla ïa ka kot ai jingïarap ka la pynlong ïa u ban rai ban pynjur ïa ka jingïakhih.
