Ranchi, Nailur:
Ka kynhun jong ki nongïalam jong ka INDIA bloc ka la ïakynduh ïa u heh ophisar jong ka Jharkhand u K Ravi Kumar bad aiti ïa ka jingthoh ba la kynnoh ba ki nongbud jong ka BJP bad ki Booth-level agent ki pynbor ïa ki Booth-level ophisar (BLO) ha ki katto katne ki distrik ban pyndam noh ïa ki kyrteng jong ki katto katne ki nongthep vote lyngba ka Electoral Rolls-Form-7.
Katei ka kynhun ka la kynnoh ba kum kine ki jingjia la jia na ki distrik kiba kynthup na Garhwa, Godda bad Chatra. Ka la kyntu ïa u Chief Electoral Officer ba un wad ïa kiba donkti bad ban sdang ban leh eiei pyrshah ïa ki.
“Ki khubor na ki katto katne ki district, kynthup ïa ka Garhwa, Godda bad Chatra, ki dang wan ba ki nongtrei jong ka BJP bad ki Booth-level Agent (BLA) jong ki, ki pynbor ïa ki BLO, ba kin weng noh ïa ki kyrteng jong ki nongthep vote ba kyrpang, na ka thup kyrteng jong ki nongthep vote,” ong u General Secretary ka JMM, u Vinod Kumar Pandey, ha ki nongthoh khubor hadien ba la wai ka jingïalang.
U president ka Jharkhand Congress, u Keshav Mahto Kamlesh, ha ryngkat ki nongmihkhmat jong ka RJD bad ka CPI (ML) Liberation, ki la don lang ha katei ka kynhun.
Ïa ka Form-7 la pyndonkam ban pan jingpyndam ïa ka kyrteng na ka thup nongthep vote.
Ki nongïalam ka INDIA bloc ki la pynpaw ïa ki jingeh jong ki ha ka phang jong ka Special Intensive Revision (SIR) ïa ka thup kyrteng thep vote kaba dang ïaid mynta ha kane ka jylla.
Hynrei u Kumar u la ong ba ka rukom pynkylla ka long kaba shai bad ba ym lah ban pynduh ïa ka kyrteng jong u nongthep vote uba dei hok.
U la ong ba mynta la khot ïa ki jingdawa bad ki jingpyrshah kum shi bynta jong ka jingpyntreikam.
Ki agent kiba don ha ka kyrdan Booth ki lah ban aiti ïa ki jingpyrshah da kaba bun, da kaba buh pud haduh 10 tylli ki phorm ha ka shisngi sha ki BLO, la ong u CEO.
“Ka rukom treikam ka SIR ka long kaba khuid, ym lah ban pyndam ïa ki kyrteng jong ki nongthep vote, ïa ki jingtip ba bniah jong ka Form-6 lane Form-7, kum ka jingdon jong ki phom ba la ioh bad ki kyrteng jong ki nongthep vote, nalor kiwei, lah ban peit lyngba ka website”, la ong u Kumar.
U la kyntait ruh ïa ki jingsngewkhia ba lah ban weng rieh ïa ki kyrteng jong ki nongthep vote halor ka nongrim jong ki jingtip kiba bakla, da kaba khot ïa kum kane ka jingmut “kaba bakla pura”.
