Kohima, Nailur:
U Symbud Myntri Rangbah jong ka ka Nagaland u Y Patton ha ka 3 tarik, Nailur, u la ïathuh ha ka Ïingdorbar jylla ba ka sorkar ka dang shim ïa ki lad ki lynti ban khanglad ïa ka jingwan jia biang jong ka jingïakynad kaba dang shen ha khappud Nagaland bad Assam bad ban ïada ïa ki nongshong shnong kiba sah ha ki jaka ba don ka jingïakynad.
Haba jubab ïa ka jingïakren ba la wanrah da u MLA bad u Advisor Achumbemo Kikon halor ka jinglong jingman, u bah Patton u la batai bniah ïa ki jingjia kiba la ïathuh ha ka 25 bad 26 tarik u Nailar ha ka thaiñ Mekirang/ Neghrebil jong ka Sector D jong ka Disputed Area Belt (DAB).
Katkum ka jingong u Patton, la kynnoh ba arngut ki Chairman shnong bad uwei u nongmihkhmat jong ka Lotha Lower Range Public Organisation ki la shah thombor ha ka jingïakhih ha ka 26 tarik u Nailar bad hadien kata la ujor ejahar ha Bhandari Police Station ha ka 27 tarik u, Nailar.
Ka sienjam kaba kongsan kaba la shim hadien ki jingjia ka long ka jingpyntreikam ïa ka komiti ïasuk ha khappud da ki bor synshar distrik Wokha bad Golaghat. Kane ka komiti ka thmu ban pynkhlaiñ ïa ka jingïatreilang hapdeng ki ar tylli ki jylla, ban pynneh ïa ka jingsuk ha shilynter u pud u sam bad ban ïada na ka jingïakynad kaba ïkham jur.
U Patton u la kdew ruh shaphang ka jingïakynad halor ka jingshah beh shnong ha katei ka thaiñ. U la ong ba 205 tylli ki longing la ai ïa ki jingpynbna pynkynriah ïing ha ka por ba pynlong ïa ka jingpynkynriah ïing lang ha u bnai Nailar, 2025, ha kaba 146 tylli ki longïing la pynkynriah noh hadien kata. Ïa ka jingpynkynriah ïa ki 59 tylli ki longïing kiba dang sah la pynsangeh noh da ka ïingbishar.
Ka Gauhati High Court, lyngba ka hukum kaba la pynmih ha ka 18 tarik u Nailar, 2026, naduh katei ka por ka la ai por shuh shuh ïa ki 59 tylli ki longïing ban pynkynriah noh ïa katei ka jaka, ong u Patton.
U Symbud Myntri Rangbah u la pynthikna ha ka ïingdorbar ba ka sorkar jylla ka buddien bha ïa ki jingjia ha ka DAB bad ka buddien ïa kane ka kam ha baroh ar ki kyrdan jong ka jylla bad ka sorkar pdeng.
U la ong ba ka bor synshar jong ka Wokha distrik, ba la ïalam da u Deputy Commissioner bad ki Border Magistrate, ki ïatreilang bad ki paralok jong ki na Assam ban ïada ïa ki shnong ki thaw, ki jaka shong jaka sah bad ki nongshong shnong jong ki Naga ha ki jaka ba don ka jingïakajia.
U Patton u la ong ruh ba ki ar tylli ki jylla kin trei ban pynthikna ba kino kino ki jingpynkynriah ne jingpynthut ha ki por ban wan kin ym long tang shiliang.
Yn buh ïa ka “rukom treikam kaba biang” khnang ba kum kine ki kam kin long kiba ïatreilang da ki heh sorkar na Nagaland bad Assam, u la ong, da kaba ban jur ïa ka jingdonkam ban khanglad ïa ka jingjia biang jong ki jingïalehkai ha ka 25 bad 26 tarik u Nailar.
