New Delhi, Nailur:
Ka National Commission for Protection of Child Rights (NCPCR) ka la pyllait im ïa palat 3,800 ngut ki khynnah bad ka la pynsuk ïa ka jingpynrung ïa palat 575 tylli ki jingujor ejahar ha ka por ba pynlong ïa ka jingïalap ba kyrpang ha ka ri India pyrshah ïa ka jingpyntrei ïa ki khynnah, ka jingkhaïi bad ka jingshah lehbeiñ, la ïathuh ka Ministry of Women and Child Development.
Ïa kane ka jingïalap ka “Pan-India Rescue and Rehabilitation” la sdang ha ka 12 tarik, Jylliew bad bteng haduh ka 31 tarik, Nailar, ha kaba ka NCPCR kan ïatreilang bad ki sorkar Jylla bad ki bor synshar jong ka Union Territory ban lap bad pyllait im ïa ki khynnah kiba trei kam khynnah lane kiba shah ktah ha ka jingkhaïi bad jingshah lehbeiñ.
Ka kynhun jong ka hok jong ki khynnah kaba la buh da ka aiñ ka la ïatreilang bad ki Majistor District, ki tnad treikam, ki bor pulit bad kiwei kiwei ki nongïashim bynta ban pynjur ïa ki kam pynlait im, khamtam ha ki jaka ba la ithuh kum ki jaka ba jur bha ka jingtrei bad jingkhaïi ïa ki khynnah.
Kum shi bynta jong ka jingïalap paidbah, ka NCPCR ka la kyrpad ïa ki bor ba dei peit ban pynlong ïa ki kam pyllait im ba la thmu bad ban ïasam man ka por ïa ki jingtip ba bniah shaphang ki khynnah ba la pyllait im, ki ejahar ba la pynrung, ki lad pynbha, ka jingpynphai biang sha ki longïing, ka jingpynlong ïa ka jinghikai bad ka jingsiew bai lutksan, nalor kiwei kiwei ki jingjia ba la bud bniah.
Ka komishon ka la pynlong ruh ïa ki jingïalang bad ki bor synshar distrik ban buddien ïa ka jingpyntreikam ïa kane ka jingïakhih bad ban weng ïa ki jingeh kiba ïakynduh ha ka por ba pynlait im.
Ki jingialang ki la pynleit jingmut ha kaba weng ïa ki jingeh ha ka jingtreikam, ban pynthikna ban aiti ha ka por ïa ki kaiphod ba la shim khia bad ban pynbha ïa ka jingïatreilang hapdeng ki tnad bad ki tnad treikam, la ong ka tnad.
Ka NCPCR ka la pynlong ruh ïa ki jingpynsngewthuh bad jingpynphriang lyngba ki social media bad kiwei kiwei ki lad pynïadei, da kaba pynshlur ban ai jingtip shaphang ka jingtrei kam jong ki khynnah bad pynpaw ïa ka jingdonkam ban pynbha pat bad ka jingpynlong tynrai ïa ka jinghikai ïa ki khynnah ba la pyllait im.
Katkum ka jingong jong ka tnad, ka jingbuddien kaba bteng bad ka jingïatreilang bad ki bor synshar ha ka jylla ka la pynlong ïa palat 3,800 ngut ki khynnah ban pyllait im ha ka por ba pynlong ïa ka jingïakhih.
La pynrung ruh palat 575 tylli ki ejahar ha kaba ïadei bad ki jingjia ba la ithuh ha ka por ba pynlong ïa ka jingkhynra.
