Guwahati, Nailur:
Ka Assam ka thmu ban pynïasoh ïa ka Artificial Intelligence (AI) ha ka jinghikai skul, ha kaba ka Samagra Shiksha Assam ka la ïasoi ïa ka jingïateh bad ki hynriew tylli ki Corporate Entity bad ka IIT Madras ban pyntbit ïa ki nonghikai ha kaba pyndonkam ïa ki tiar ba la pynshong nongrim ha ka AI na ka bynta ban shna ïa ki jinghikai.
U myntri ka tnad pule puthi ka jylla u Ranoj Pegu u la ong ba kane ka jingthmu ka thmu ban pynïasoh ïa ka teknoloji khamtam ka AI ha ka jinghikai skul bad ban pyndap ïa ki nonghikai da ki tiar kiba mynta ban pynkhreh ïa ki jinghikai.
Hapoh kane ka jingthmu, ka IIT Madras kan ai ïa ka platform ba kyrpang jong ka AI ba la shna na ka bynta ki jingthmu pule puthi. Ka bynta kaba nyngkong kan pynleit jingmut ha kaba ai jinghikai ïa ki nonghikai ha Assam ban pyndonkam ïa ka rynsan ban pynwandur ïa ki jinghikai.
Ka jingïateh kular kaba kum kane la ïasoi ruh bad ka Google AI, da ka jingthmu ban pynlah ïa ki nonghikai ban pyndonkam ïa ki tiar ba la pynshong nongrim ha ka AI na ka bynta ban thmu ïa ki jinghikai bad ban pynkhreh ïa ki kamra klas.
U Pegu u la ong ba ha kaba nyngkong yn sdang ïa ka projek test ha ki 70 tylli ki skul, ha kaba yn hikai ïa ki nonghikai ban shna ïa ki plan jinghikai da kaba pyndonkam ïa ki tiar thymmai jong ka AI.
Kane ka jingthmu ka long ban tei ïa ki sap jong ki nonghikai ha ka liang ka teknoloji bad ban wad bniah ïa ka jingpyndonkam ïa ka AI ban pynbha ïa ki rukom hikai bad pule ha ki skul jong ka Assam.
