Lucknow, Nailur:
Kumba la sakhi, la ong ba ka Lucknow ka la wan hakhmat eh ha ka kyrdan jong ka ri ha ka Swachh Vayu Survekshan 2026 ha ka kyrdan jong ki nongbah kiba don palat 10 lak ngut ki nongshong shnong, katba 15 tylli kiwei pat ki nongbah jong ka Uttar Pradesh ruh ki la ïoh jaka ha ki kyrdan bapher bapher, la ong ka sorkar jylla ha ka kyrwoh ba la pynmih.
Ka Lucknow ka la kamai 198 point ban wan nyngkong, hakhmat ka Indore da 197 bad ka Jabalpur da 195, la ong ka sorkar bad bynrap ba ïa kane ka jingbuh kyrdan la pynshong nongrim ha ka jingwad bniah ba la leh da ka Central Pollution Control Board bad ka tnad sorkar pdeng jong ka Environment, Forest and Climate Change.
Ha ka kyrdan ba palat 10 lak ngut ki nongshong shnong, ka Agra ka la wan ha ka kyrdan kaba saw da kaba kamai 192 point, ka Ghaziabad ka la wan ha ka kyrdan kaba hynriew da kaba kamai 184 point, ka Kanpur ha ka kyrdan kaba 11 da kaba kamai 183.2 bad ka Prayagraj ha ka kyrdan kaba 13 da kaba kamai 180. Ka Meerut bad ka Varanasi ki wan ha ka kyrdan kaba 22 bad 34.
Ha ka kyrdan jong ki nongbah kiba bun briew hapdeng lai lak bad 10 lak, ka Firozabad ka la ïoh ïa ka kyrdan kaba ar da kaba ïoh 195 point, katba ka Jhansi ka wan ha ka kyrdan kaba phra da kaba ïoh 192.5 point.
Ka Moradabad bad ka Noida ki la ïatreilang ban khur ïa ka kyrdan kaba phra da kaba kamai mar 187.5 point. Ka Gorakhpur bad ka Bareilly ki wan ha ka kyrdan kaba 22 bad kaba 26.
Napdeng ki nongbah kiba don hapoh lai lak ngut ki nongshong shnong, ka Raebareli ka wan ha ka kyrdan kaba 17, bud sa ka Anpara ha ka kyrdan kaba 29, ka Khurja ha ka kyrdan kaba 30 bad ka Gajraula ha ka kyrdan kaba 31.
Ha ka kyrdan ward, ka Ward 70 jong ka Lucknow ka la wan hakhmat eh ha ka kyrdan jong ka ri hapdeng ki ward sor kiba don palat 30 hajar ngut ki nongshong shnong, katba ka Ward 31 jong ka Prayagraj ka la ïoh ïa ka kyrdan kaba lai ha ka kyrdan 10,000-30,000 ngut ki nongshong shnong.
U Myntri ka tnad pynroi sor bad bording ka Uttar Pradesh, u Arvind Kumar Sharma u la ong ba ka jingjop jong ka Lucknow ha ka kyrdan ba nyngkong ka dei ka jingjop kaba khraw ïa ka jylla.
“Ka Lucknow, ha ka sien kaba nyngkong, ka la tam ïa ka Indore ban ïoh ïa ka kyrdan ba nyngkong ha ka ri ha ka jingpynneh pynsah ïa ka lyer kaba khuid. Kane ka jingjop ka dei ka jingai mynsiem kaba thymmai ïa ka Uttar Pradesh,” ong u Sharma, katkum ka kyrwoh.
Ka sorkar ka la ong ba kane ka jingbuh kyrdan ka pyni ïa ka jingïatreilang jong ka tnad pynroi sor, ki bor shnong bad ka Uttar Pradesh Pollution Control Board hapoh ka National Clean Air Programme.
Ka la ïathuh ba ka Lucknow Municipal Corporation ka la ïoh ïa ka khusnam ba nyngkong kaba T.1.5 klur ha ka kyrdan jong ka, katba ka Firozabad Municipal Corporation ka la ïoh 25 lak tyngka. Ka Lucknow Ward 70 ka ïoh T.50 lak bad ka Prayagraj Ward 31 T.20 lak.
Ka sorkar ka la pynshong nongrim ïa ka jingtreikam jong ka Lucknow ha ki lad ki lynti kiba kynthup ïa ka jingkit jingbah da ka bording, ka jingpynkhanglad ïa ka jingpum pum ha surok, ka jingpynïaid ïa ki jaboh jabaiñ katkum ka jingstad saïan bad ka jingkyntiew ha ka ban nang pynroi ïa ka jingdon jong ki dieng ki siej bad ki lum bajyrngam.
Ka la ïathuh ba kumba 1,100 tylli ki kali elektrik la pyndonkam na ka bynta ban lum jaboh na jingkhang sha jingkhang, katba 140 tylli ki bos elektrik, 97 tylli ki mashin pynkhuid bording ba la pyndonkam da ki mashin, 12 tylli ki jaka Charge bad 916 tylli ki jaka Charge ki dang treikam ha ka nongbah.
Ka sorkar ka la ong ba 559.85 km ki surok la siang rong naduh kut haduh kut bad ka Lucknow ka don ïa ki jingpynbeit na ka bynta ban pyntreikam ïa ki jaboh ha ka rukom saïan bad ka jinglah ban kit 2,550 ton ha ka shisngi.
Ka Mayor ka Lucknow ka Sushma Kharakwal ka la pynshong nongrim ïa katei ka jingjop ha ka jingtreilang jong ka sorkar, ki nongshong shnong, ki konsillor bad ki nongtrei jong ka Municipal, ong ka kyrwoh.
