Chandigarh, Nailur:
Haba dang sah sa tang san bnai eiei ban pynlong ïa ka elekshon sha ka ïingdorbar thawaiñ jong ka Punjab ha u snem 2027, ka Bharatiya Janata Party (BJP) ka la pynbna ïa ka ‘Nasha Mukt Punjab Yatra’ kaba 12 sngi bad kaba jngai 4000 kilomitar kaba sdang naduh ka 18 tarik u Nailur.
Kane ka yatra kan kynthup ïa baroh 117 tylli ki Assembly konstitwensi hapoh ka jingpyrta ‘Bhajpa Da Naara, Nasha Mukauna Saara’, ha kaba ka seng BJP ka wad ban pynpaw ïa ka jingdih drok, ka aiñ bad ka synshar khadar kum ki mat ba kongsan ha ka jingïalap saiñ pyrthei jong ka.
Ka seng ka la tyrwa ruh ba lada jied ïa ka bor synshar, kan thaw ïa ka kynhun wad bniah pyrshah ïa u drok ka ban wanrah ïa ki pulit Punjab bad ki tnad wad bniah ha kawei ka rynsan.Ka la pynpaw ruh ba ïa u drok la die kum ki toffee ha kane ka jylla bad ka kam lehnoh nacro ka dei ka bynta jong ka buit jong ka jylla ba jylliew jong ka Pakistan.
U President ka BJP national u Nitin Nabin un pynher lama ïa ka yatra kaba nyngkong na Ekta Sthal ha Madhopur, Sujanpur, ha Pathankot district, ha ka 18 tarik u Nailur.
Ka jaka ba la pynlong prokram ka dei hajan u mot sah kynmaw jong u Syama Prasad Mookerjee, u nongseng jong ka Bharatiya Jana Sangh.
U myntri ka tnat ki kam pohïing ka sorkar pdeng u Amit Shah un ai jingkren ha ka jingïalang paidbah ha Jalandhar ha ka 30 tarik, Nailur ban rakhe ïa ka jingpynkut ïa kane ka yatra.
U vice president ka BJP National u Manpreet Badal u la ong ba ïa ka thma pyrshah ïa u drok ym lah ban jop tang da kaba ujor ejahar pyrshah ïa ki nongdih drok bad ki nongdie drok, da kaba bynrap ba ka jingpyrkhat ka hap ban phai sha ka jingpynbha pat.
U la ong ba ka jingialeh kaba shisha ka shong ha kaba pynpra ia ka network jong u drok da kaba bud ïa ka jingïaid ka pisa ban ïa kaba beh ïa ka song drok.
U Badal u la ong ba kam don jingduna ïa ki jingpyrta ha ka jylla katba kum ka jingïalap pyrshah ïa u drok, hynrei ka jylla ka duna ïa ka buit treikam kaba shisha.
