Dehradun, Nailur:
Ka jingkiew jong kiba ïoh ïa ka jingpang Swine Flu ha kylleng ki bynta jong ka Kumaon jong ka Uttarakhand, ka la buh ïa ki bor pynïaid ka koit ka khiah ha ka jingmaham, ha kaba saw ngut ki nongpang ki la ïap bad 18 ngut ki la ïoh ïa ka jingpang H1N1 ha ki hospital ha Nainital distrik.
Ki heh ka tnad ka koit ka khiah ki la ïathuh ba la lum ïa ki nongmuna na ki 127 ngut kiba la suba ba ki dei ki nongpang haduh hynnin ka sngi.
Na kine, 18 ngut ki la shah pynshisha ba ki la long positive hadien ba la dep ban leh ïa ka test, ha kaba kiba bun tam kiba ïoh pang, ki dei ki nongshong shnong jong ka Nainital distrik.
Ki nongpang kiba pang ki dei 5 ngut na kiwei pat ki distrik, kynthup na Almora, Pithoragarh bad Bageshwar, katba arngut ki dei kiba sah sha kiwei pat ki jylla. Ïa kine ki nongpang la buh ha ki Hospital bapher bapher ha kylleng ka Nainital distrik na ka bynta ban ïoh jingsumar.
U Chief Medical Officer ka Nainital u Dr Rashmi Pant u la ïathuh ba saw ngut ki nongpang H1N1 kiba dang shah sumar ha ki Hospital hapoh ka distrik ki la khlad noh.
Arngut na kitei ki dei kiba shong ba sah ha Nainital, katba arngut kiwei pat ki dei kiba sah ha Bageshwar bad Pithoragarh distrik.
“Halor ka jingïoh ïa ka jingpang swine flu, la bthah ïa baroh ki Hospital ha ka distrik ba kin long kiba husiar bad ban pynneh ïa ka jingpynkhreh kaba donkam ha ka liang ka jingsumar,” ong u Dr Pant.
“La buh kyrpang ruh ïa ki jingthiah kiba kyrshan da ka oxygen ban pynthikna ïa ka jingsumar ha ka por kaba biang ïa ki nongpang.”
Ka jingpdiang ïa ki nongpang na ki distrik ba marjan bad kiwei kiwei ki jylla ka la pynjur ïa ka jingeh ha ki jaka sumar jong ka Nainital.
Na ka liang ka tnat ka koit ka khiah ka dang buddien bha ïa ka jingpynkhreh jong ki hospital, ka jingdon ki dawai bad ka jinglong jingman jong ki nongpang ba ïoh ïa kane ka jingpang.
La bthah ïa ki hospital ban pynthikna ba kin ïoh mardor ïa ka oxygen bad kiwei kiwei ki jingïarap ba kongsan ha ka liang ka koit ka khiah ha kano kano ka por ba donkam.
Ka tnad ka la kyntu ruh ïa ki nongshong shnong ba kim dei ban iehnoh ïa ki dak jingpang kiba dang sahteng.
Ki heh sorkar ki la ong ba ka jingpang jyrhoh, jingshit, ki dak kum ka jingpang kaba ktah ïa ka bor ring bad pynhiar mynsiem kaba neh palat ïa ka hynñiew sngi ym dei ban lehsting kum ka jingpang ba ju jia man ka por.
La bthah ïa ki briew kiba mad ïa kum kine ki dak jingpang ba kin leit sha ki jaka sumar ne hospital kiba jan tam ban phah eksamin ïa ki doktor.
La bthah ruh ïa kito kiba ïakynduh bad u briew uba ïoh ïa ka jingpang ba kin long kiba husiar bha.
“Ka jingtest kloi bad ka jingsumar ha ka por kaba biang ka long kaba kongsan bha ban ïada na ki jingeh bad ban khanglad ïa ka jingsaphriang jong ka jingpang,” ong u heh ka tnad ka koit ka khiah.
Ki jingtip jong ka tnat ka koit ka khiah jong ka jylla ki pyni ba palat 30 ngut ki briew kiba ïap na ka jingpang Swine Flu la ïoh jingtip ha Uttarakhand hapdeng u snem 2019 bad 2026.
Ka jingkiew kaba jur eh ka long ha u snem 2019 bad hapoh une u snem ba mynta.
Ha kine ki snem kiba bun na ki nongshong shnong jong ki thaiñ ha ka jylla ki la shah ktah jur na ka jingpang ha kaba kiba bun na ki longïing ki la ïohmad ïa ki jingeh ha kaba ki la duhnoh ïa ki baïeid bathoiñ jong ki.
Ka jylla ka la sakhi ïa ka jingpang H1N1 kaba jur tam ha u snem 2019, ha kaba palat 21 ngut ki briew ki la ïap hapoh ki ar bnai ba nyngkong jong u snem.
Na ka jingkhmih bniah, la shem ba kiba bun na kiba ïoh ïa ka jingpang ki la shah sumar ha ki jaka sumar bapher bapher, hynrei don napdeng jong ki kiba la sniewbok ha kaba ki nongsumar kim lah ban ai jingïarap.
Ha kaba ïadei bad kane ka jingpang ki bor ba dei khmih, ki la bthah ïa ki riewpaidbah ba ki dei ban long kiba husiar ha kane ka kynti kaba mynta khnang ban lah ban khanglad ïa ka jingktah bajur jong ka jingpang bad ban lait na kino kino ki jingjia basngewsih.
Une u khñiang jingpang u la ïoh biang ban ktah ha kane ka jaka ha u bnai Nailar bad Nailur jong u 2026.
Ki kaiphod ba dang shen na ki tnad ki pyni ba la ïoh saw ngut kiba ïap tang ha ka distrik Nainital, katba ka jingïap ha baroh kawei ka aïom, kynthup ïa kiba ïap ha Dehradun bad kiwei kiwei ki distrik, ka la palat ïa ka san ngut.
