Bhopal, Nailur:
Ka Myntri Rangbah barim jong ka Madhya Pradesh, ka Uma Bharti, ka la pynthymmai ïa ka jingkyntu jong ka, ban khang syndon ïa ka kyiad ha ka jylla Madhya Pradesh, hadien ka jingïap briew dang shen, namar ka jingdih ïa ka kyiad ba long bih ha ki shnong jong ka thaiñ Banda jong ka Sagar distrik.
Da ka jingsngewsih kaba khraw namar ki jingïap, ka Bharti, kaba long ka Myntri barim jong ka sorkar pdeng bad kawei na ki khmat ba paw jong ka Ayodhya Ram Temple Movement, ka la ther ïa ki nongmihkhmat paidbah naduh u Sarpanch shnong haduh ki MLA bad MP, namar ba kim shym la lah ban khanglad ïa ka jingshna bad die ïa ki kyiad ba sniew bad kaba la shna thok.
“Haduh ba ki nongmihkhmat paidbah, naduh u Sarpanch shnong haduh u MLA bad MP kim pyndep hok ïa la ka kamram, ym lah ban khanglad ïa ka jingdih kyiad thok bad be-aiñ. Ki nongmihkhmat paidbah ki leh aiu? Balei ki sngap jar halor kane ka mat. Baroh ki nongmihkhmat paidbah haduh ki MLA bad ki MP, ki dei ban shah kylli jingkylli hato la ki tip ne em shaphang ka jingshna bad ka jingdie kyiad thok ha ki shnong ki thaw. Lada ki tip ïa kane, ki donkam ban ïathuh sha ki paidbah, la ki la pyntip sha u heh pulit jong ka distrik ne em,” ong ka Bharti ha ki nongthoh khubor hadien ba ka la ïakynduh ïa u Myntri Rangbah u Dr Mohan Yadav ha ka ïingsah jong ka ha Bhopal ha ka lah sngi U Blei.
Ka jingkren kaba shai jong ka Bharti shaphang ka jingbym shimkhia jong ki nongmihkhmat na ka thaiñ ïa ka jingma jong ka kyiad be-aiñ/ba thok ka shim ïa ka jingmut kaba kyrpang, namar hynñiew ngut na ki 8 ngut ki MLA ha ka distrik Sagar ki dei ki nongthaw aiñ jong ka BJP, katba arngut ki MP (u Sagar bad u Damoh MP) ruh ki dei tang na ka BJP. Kaba kongsan ka long ba ka Bharti ruh ka wan na katei ka juh ka thaiñ Bundelkhand, kaba don ha Sagar distrik.
Halor ka mat jong ka jingpynpra ïa ki jaka be-aiñ kiba dang ïaid shakhmat bad ki jingwan rung tuh jong ki jaka ba la shah kynnoh bad ki nongïarap ha Sagar distrik, ka Bharti ka la kylli, “Kum kine ki jaka be-aiñ kim shym la tei hapoh ar sngi, kin sa wan ha ki san haduh hynñiew snem, kaei kaba ki heh sorkar ba la buh hangta ki dang leh haba kine ki jaka ki dang shna. Ha kaba ïadei bad ka jingpynduh ïa ki mar, ka jingpynshitom ka la dei ban don khnang ban lah ban pynthikna ïa ka jingleh pyrshah ïa ki heh kiba hapoh ki kam jong ki la shah ban tei ïa kita ki ïing bad ki jingtei be-aiñ.”
Haba pynthymmai ïa ka jingkhot jong ka ban khang pyrshah syndon ïa ka kyiad ha ka Jylla, ka Bharti ka la ong, “Lada ka Banda ka dei ka jingeh, te ka Shivpuri ka dei ka lad ban pynbeit ïa kaei kaba ki kynthei ki la leh ha Shivpuri ka long kaba dei ban ïaroh, ki kynthei jong ka Shivpuri distrik ki donkam ban long ka nuksa ïa ki kynthei ha kylleng ka jylla. Tang ki kynthei ki la lah ban ïakhun ban khang pyrshah ïa ka jingdie, jingpynmih bad jingdih kyiad ha ka jylla. Hato ki doktor kim shym la kyntu ïa nga ban shongthait na ka bynta 45 sngi namar ka jingpang tyrha kaba bteng bad ki jingeh kiba ïadei bad kane, ngan jin da la leit sha Shivpuri bad pynkup burom ïa kito ki kynthei, kiba la khanglad ïa ka jingdie kyiad kaba dang shen. Ai ba ngan long kaba bit, ngan ïakynduh ïa kito ki kynthei kiba shlur bad ngan ïalam ïa ki kynthei ha kylleng ka jylla na ka bynta ban khang lut ïa ka kyiad.”
“Lada ka kyiad ba don bih ka pynïap ïa ki 100-200 ngut ki briew ha ka shisien dih, ka kyiad ba la pynlong aiñ ruh ka long kaba ma kumjuh ïa ka koit ka khiah jong u briew, namar ka pynjot suki suki ïa ki dkhot met kiba kongsan, kynthup ïa ki tor, u dohnud bad ki khyllai, khlem pep kan ïalam sha ka jingïap. Ka la dei la por ba ka jylla jong ngi ka la ïaid shakhmat na ka bynta ban khang syndon ïa ka kyiad, kaei ka ban jia kan sa paw shen. Ki kynthei kin sa lamkhmat na ka bynta ka jingïakhih ban dawa halor ka jingpynduh pyndam ïa ka kyiad, nga la long kaba la khreh na ka bynta kane ka jingïakhih.”
La pynmih shi bynta da ka jingsngewkhia ïa ka jingshngaiñ bad ka jingbitar paidbah hadien ki jingjia ba ïadei bad ki jingdih buaid ha Madhya Pradesh (kum ha ka distrik Sagar), ki kynthei dang shen ki la mih sha surok ha ki shnong ba bun jong ka distrik Shivpuri dang shen.
La ïathuh ba ki kynthei bad ki nongshong shnong ki la rung tuh sha ki dukan kyiad kiba la ai license da ka sorkar bad kiba be-aiñ, ki la pynpra ïa ki jingkhang, ki la bret ïa ki synduk kyiad sha ki nala um, bad ki la thang ïa ki katto katne ki stok.
Ki kynthei riewlum ki la pynlong ruh ïa ka pakhang surok (chakka-jam) kaba 5 kynta ha ka surok Khod-Sirsaud da kaba dawa ban khang syndon bad ban shakri kham bha ha ka imlang ka sahlang.
Kaba kongsan ka long ba ha ka por jong ka jingsynshar jong ka BJP mynshwa ha ka jylla kaba la ïalam da u Shivraj Singh Chouhan Myntri ka tnad Agriculture jong ka sorkar pdeng ba mynta, ka Bharti ka la mih sha surok, da kaba ïalam ïa ki kynthei ha kylleng ka jylla, kynthup ha Bhopal pyrshah ïa ki jaka die kyiad kiba treikam ha ki jaka sah briew.
