Imphal, Nailur:
Ki suba lehnoh ki la hiar thma ïa ka shnong Chawangkining Naga ha ka distrik Kangpokpi jong ka Manipur ha ka miet jong ka sngi Ba-ar, kaba la pynmih ïa ka jingïasiat bad ki bor pahara bad la pynlong ïa ym duna ïa ka artylli ki ïing kiba la pluh, ong ki heh sorkar ha ka 16 tarik Nailur.
Kane ka jinghiar thma ka la jia ha ka por kumba 10.30 mynmiet, ha kaba ka kynhun kaba heh jong ki lehnoh kiba kieng atiar ki la thmu ban thombor ïa katei ka shnong kaba don ha ka jaka lum.
Ki pulit CRPF kiba don ha katei ka jaka ki la pynphai kylla ïa ka jingsiat hadien ba la sdang ban siat.
Katkum ka jingong jong ki heh sorkar, ka jingsiat kaba man ka por ka la bteng haduh kumba hynriew kynta, haduh kumba 4.30 mynstep jong ka sngi Balang.
Ki bor pahara ki la khanglad ïa ki lehnoh ban rung shapoh katei ka shnong, wat la ar tylli ki ïing dieng kiba don ha ki rud shnong jong ka ki la shah thang.
U trai shnong u Daniel Charenamai u la ïathuh ba katei ka jingshah thombor ka la sdang ha ka por kumba 10.30 mynmiet bad ba ka jingïasiat ka la bteng haduh kumba 4 baje eiei mynstep.
“Ka shnong jong ngi ka la shah thombor ha ka por 10.30 mynmiet, ki pulit CRPF kiba la shah pyntreikam hangne ki la siat biang bad khanglad ïa ka shnong ban shah thombor”, u la ong.
Kane ka jinghiar thma ka la jia katto katne kynta hadien ba arngut ki kynthei Kuki ki la shah siat ïap ha Leisangphai kaba don marjan ka Tamenglong distrik.
U nongthaw aiñ jong ka Naga Peoples’ Front bad u heh nongïalam jong ka seng Naga u Awangbou Newmai u la pynrem ïa baroh ar tylli ki jingpynïap briew bad ka jingthang ïa ki ïing ha Chawangkining.
U la ong ba kum kine ki kam thombor kin ym ai jingmyntoi ïa kano kano ka jaitbynriew.
Kum shi bynta ban khanglad kum ïa kine ki jingjie, ki bor ba dei khmih hapoh ka jingtreikam jong ki bor jong ka aiñ, ki la ïaleh ban pynjur ïa ki jingpahara bad ki jingpeit ngor khnang ban lah ban khanglad ban ïaleh pyrshah ïa kino kino ki kam pyntriem kiba wan na ki riewkieng atiar bad ki riewshim kabu.
Kumba ka long mynta, ki bor pahara ki la pynkhlaiñ jur ïa ki jingleit khynra bad ki jingleit pahara ha kane ka shnong bad ki bynta ba marjan jong kane ka shnong ba la jia ka jingshah thombor ha ki lehnoh ha kaba la pynjur ïa ki jingpyrkhing ban khanglad ïa ki jingïakhih paidbah.
Kawei ka MLA ka Kuki na Saikul konstitwensi ha Kangpokpi ruh ka la pynrem jur ïa ka jingshah pynïap kine ki arngut ki kynthei, da kaba ong ba kawei na kitei kiba la shah pynïap ka dei kaba dang shu pyndep ïa ka jingpule Nursing.
Kane ka MLA ka la kynnoh ba ki dkhot jong ka NSCN-IM bad ka ZUF-K ki donkti ha ki kam pynïap briew.
“Ka jingpynïap ïa ki kynthei kiba shida ka dei ka kam thombor bashyrkhei kaba ym lah ban pynshisha da kano kano ka daw saiñ pyrthei, ka jingmut jingpyrkhat ne ka jingsngewsih”, ka la ong.
