Bhopal, Nailur:
Naba la sah sa tang hynriew bnai ban leit na ka bynta ka elekshon sha ka ïingdorbar thawaiñ jong ka Uttar Pradesh, u heh ka AIMIM, u Asaduddin Owaisi, u la tyrwa paidbah ïa ki seng pyrshah ban thaw ïa ka jingïateh lok kaba thmu ban khanglad ïa ka BJP ban wanphai biang sha ka bor ha ka sien kaba lai lynter ha kane ka jylla kaba kongsan bha ha ka saiñ hima sima.
“Ngi la thmu ban leh katba lah ban khanglad ïa ka BJP ban wan ha ka bor synshar ha UP ha ka sien kaba lai,” ong u Owaisi ha ki nongthoh khubor ha Bhopal ha ka sngi Ba-ar.
“Ngin sa pyrshang tyngeh ban pynthikna ba kan don ka jingïatylli kaba lah ban khanglad ïa ka BJP ban wan ha ka bor ha ka sien kaba lai. Ngi la pynkhreh ban ïatreilang bad baroh kito ki seng kiba pyrkhat ha kajuh ka rukom ha UP,” u la ong.
U Owaisi, u ïathuh ba ka AIMIM, ka la buh ïa kajuh ka jingtyrwa sha ki seng pyrshah ha Bihar, ha kaba ka la pan 6 tylli ki seat, hynrei ïa katei ka jingtyrwa, kam shym la pdiang satia.
“Ngi la pynlong ïa ka jingkyrpad kaba kum kata ha Bihar, nga la ai da ka jingthoh ba baroh kaba ka AIMIM ka kwah ka long tang hynriew tylli ki seat ha Bihar. Hynrei ïa ka jingtyrwa jong ngi ym shym la pdiang,” u la ong.
“Ngi la pynlong ïa ka jingkyrpad ha Bihar, wat hapdeng ka jingshisha ba saw ngut ki MLA jong ngi ha Bihar, ki la shah pynlong ban phet noh sha kawei pat ka seng (RJD).
U Owaisi u la ong ba shen un sa sdang ïa ka jingïakhih kaba tyngeh ha Uttar Pradesh, kaba sdang da ka jingïalang paidbah ha Kanpur ha ka Sngi U Blei ban wan, bud sa ka jingleit jngoh ïa ka Shravasti bad Azamgarh.
Halor ka Uniform Civil Code (UCC), u Owaisi u la kynnoh ba ka jingpyntreikam ïa ka ha ki jylla ba la synshar da ka BJP ka long ban thmu ïa ki paidbah Muslim jong ka India bad ban pynpra noh ïa ki jingïada jong ka Riti synshar ka ri kiba lah ban ïoh ïa ki jaitbynriew rit paid katkum ka Article 25, 26 bad 29.
Ïa ka UCC la pyntreikam nyngkong eh ha Uttarakhand bad la pyntreikam biang ïa kane ha Gujarat, Assam bad Madhya Pradesh, u la ong.
U Owaisi u la kynnoh ba ki aiñ kiba la pynrung hapoh ka UCC ki pynjari da kaba pyntreikam ïa ki kyndon kiba la pynshong nongrim ha ki aiñ shimet jong ki Hindu, kynthup ïa ka aiñ shim pateng jong ki Hindu, ka aiñ shongkurim Hindu, bad ka aiñ shim khun bad pynneh pynsah ïa ki Hindu, ha ki bym dei ki Hindu.
“Tang ki Sections number’ la pynkylla, lym kumta la pyntreikam ïa ka aiñ Uttarakhand UCC ha kiwei pat ki jylla ba synshar ka BJP, kynthup ïa u MP. Kane ka long kaba bakla shisha. Ban pynbor ïa ki aiñ jong kawei ka niam halor kawei pat ka long pyrshah ïa ka jingïaryngkat bad ka jinglaitluid ha ka niam. Dei na kata ka daw ba ngi pyrshah ïa kane”, u la ong.
U la buh jingkylli ruh ïa ka jingshah kyntait jong ki riewlum na ka UCC ha Madhya Pradesh katba ki Muslim pat ki shah ktah ha ka.
“Ki riewlum ki don 19-20 percent na ka jingbun briew ha Madhya Pradesh, hynrei la buh ïa ki shabar jong ka jingpeit jong ka UCC ha MP. Ha kawei pat ka liang, ki Muslim kiba long tang 8 percent na ka jingbun briew jong kajuh ka jylla la wanrah hapoh ka jingsynshar jong ka,” ong u Owaisi.
“Phi la pynsah ïa ki riewlum namar ba ka kolshor bad ka dustur jong ki ka ïapher; ki riti shongkurim jong ki ki ïapher, bad ka niam jong ki ka ïapher. Hato ka niam jong ngi kam ïapher?” u la kylli.
