Bengaluru, Nailur:
U nongïalam ka Liang Pyrshah ha Assembly u R Ashoka u la kynthoh ba ka sorkar Congress ka shu pynbna khlem da shimkhia kaba biang namar ba ka nemsniew kaba jur ka buh jingeh ïa ki nongrep bad ki nongkyndong.
U la dawa bai lutksan T. 50,000 shi akar na ka bynta ka jingduhnong jong ki jingthung bad T.10 klur na ka bynta kawei pa kawei ka konstitwensi kaba mad ïa ka jingkyrduh um dih, kynthup ïa ka pisa na ka bynta ki tyllong um ba kyrkieh.
U Ashoka u la dawa ïa ka kot pynshai halor ka jinglong jingman jong ka pisa jong ka jylla bad ka jingpynlut ban ïarap ïa ka jingkyrduh.
U la ong ba ka sorkar jylla ka dei ban pynpaw ïa ka kyrdan jong ka tnat pla tyngka, ki jingsiew ba dang sahteng sha ki tnad bad ki jaka treikam, ka jingkit ram bad ka jingktah ha ka liang ka pisa tyngka jong ki skhim ai jingbit.
“Ka sorkar jylla ka dei ban pyllait shwa ïa ki jingïarap katkum ka jinglah jong ka bad nangta kan pan jingïarap shuh shuh,” u la ong.
Halor ka kaiphod jong ka Kasturirangan halor ki Western Ghats, u la ong ba ka BJP kan pyrshah ïa ki jingkhang palat ïa ka rep ka riang, ki jingtei bad ki lad kamai ha ka thaiñ Malnad katba ka kyrshan ïa ka jingpynneh pynsah ïa ki Western Ghats.
U la ong ba ka jingïada ïa ka mariang bad ka jingmyntoi jong ki nongshong shnong ka dei ban long kaba ïadei dur.
U Ashoka u la kynthoh ïa ka rai ban khanglad ïa ka dorbar kyrpang jong ka ïing dorbar thawaiñ tang lai sngi.
U la ong ba ka jingkyrduh um bad ka kaiphod jong ka Kasturirangan ki dei ki mat kiba kongsan kiba donkam ban ïakren bniah bad dawa ba dei ban pynjlan ïa ka dorbar la kumno kumno shi taïew.
U la pan jingshai ruh na ka Congress halor ka jingïeng jong ka halor ka ‘Vande Mataram’, da kaba ong ba ki dak jong ka ri bad ka pateng jong ka jingïakhun laitluid kim dei ban long ki phang jong ka jingïakren ha ka saiñ hima-sima.
U Ashoka u la kynnoh ba ka sorkar Congress ka la iehnoh beiñ ïa ki nongrep bad kam shym la lah ban ai jingïarap na ka jingrang tyrkhong.
Haba kynnoh ba jan 2,500 ngut ki nongrep ki la ïap na ka jingpynïap ïalade naduh ba ka sorkar Congress ka la wan ha ka bor ha u snem 2023, u Ashoka u la ong, “Kane ka sorkar ka long kaba la rem lut ha kaba ïadei bad ka jingkyrduh um, kaba pyrshah ïa ki nongrep bad kaba thok ïa ki nongrep.”
Haba thmu ïa u Shivakumar halor ki jingthmu shim jaka bad pynroi jong ka sorkar, u la ong, “Ha kawei ka liang, ki shim jaka jong ki nongrep bad ki leh ïa ka kam die jaka. Une u ‘Myntri Rangbah jong ka kam die jaka’ um tip ei ei shaphang ka jingkyrduh um. U tip tang kumno ban pynwandur ïa ki jingpynbeit.”
Ha ka jingïaid lynti jong u Shivakumar bad ka jingpeit bniah na suiñ ïa ki jaka ba la shah ktah ha ka jingkyrduh um, u Ashoka u la ong, “Tang ban aplai ïa ka Tilak/Vibhuti na ka bynta ki vote bad ban shim ïa ki jingdih ba khuid ha ka um – ha ka jaka ban leh kumta, lada ki la pyllait ïa ki T.10,000 klur tyngka ban ïarap ïa ki nongrep jong ngi.”
U Ashoka u la buh jingkylli ruh halor ka jingpynlong ïa ki jingbym pynshai jong ka sorkar, da kaba kynnoh ba ïa kane ka kam la ai sha kawei ka kompeni kaba ïadei bad ka longïing jong uwei u MLA ka Congress.
