Lucknow, Nailur:
Ka Mayawati, ka heh nongïalam jong ka seng BSP, ha ka lah sngi U Blei, ka la kynnoh ba ki Muslim ha Uttar Pradesh, kiba la kyrshan shibun ïa ka Samajwadi Party, ha ki elekshon ba ladep, mynta ki “sted” ban pynkylla ïa ka jingkyrshan jong ki, sha ka Bahujan Samaj Party, ha ka rukom jong ki Brahmin, kiba don hapdeng ki jaitbynriew ba hakhliehduh.
Ha ka jingthoh halor ka rynsan X, u Myntri Rangbah barim ka Uttar Pradesh, u la buh jingkylli ruh ïa ka jingïalap elekshon jong u SP “PDA”, da kaba kynnoh ba ka rong jong ka kali ïalap elekshon jong u, ka don kham bun ka rong saw-byrtem jong ka BJP-RSS ban ïa ka rong saw tynrai jong ka seng.
Ka Mayawati ka la buh jingkylli hato u heh ka seng SP u Akhilesh Yadav u “kylla rong kum u ñiangbshiah kylla rong na ka bynta ban ïoh jingmyntoi ha ka elekshon lane u la duh jingshaniah ban ïoh ïa ki vote jong ki Muslim.
Ka la kynnoh ba ki Muslim ki la sngewthuh ba watla ki la ai ïa ka seng SP “shibun ki vote kiba tang shiliang” ha ki elekshon ba la dep, hynrei ka seng kam shym la lah ban khanglad ïa ka BJP ban thaw sorkar ha Uttar Pradesh bad ha ka sorkar pdeng.
“Balei ki dei ban jied biang biang ïa kane ka seng bad pynsyrwa kai ïa ki vote jong ki?” ka la kylli, da kaba kynnoh ba ki Muslim mynta ki pynkylla ïa ka jinglong jong ki ban kyrshan ïa ka BSP, “kumjuh kum ka jaitbynriew Brahmin hapdeng ki jaitbynriew kiba halor”.
Ka Mayawati ka la kdew ruh ïa ka rekod synshar jong ka BSP ha Uttar Pradesh, khamtam ha kaba ïadei bad ka jingïada ïa ki kam runar, ka aiñ bad ka suk ka saiñ, ka bha ka miat bad ka roi ka par.
Ka la buh jingkylli ïa ka jingpynwandur jong ka seng SP ïa ka “PDA”, da kaba kynnoh ba ka seng ka la pyndonkam ïa ki jingbatai bapher bapher jong ka bynta kaba lyngkot na ka bynta ki jingthmu ha ki kam elekshon, kynthup ïa ki “Pichhda, Dalit” bad “Pandit”.
Ka Mayawati, ka la kynnoh shuh shuh ïa ki nongïalam ka SP, ba ki riam rong blu, kiba ïadei bad ka BSP, bad ki pynpaw ïalade kum ki nongïabud u Ambedkar, hynrei, ki ong ba ki shah kyntait ha ki briew, kum ki nongbud u Ambedkar kiba thok.
Ka BSP, ka la ong ba ka la bud ïa ka nongrim jong ki nongbud u Ambedkar ka “Sarvajan Hitay, Sarvajan Sukhay” bad ka la shimkhia ïa ka bha ka miat, ka burom ka akor, ka ïoh kam ïoh jam bad ka jinglah ban shaniah ha lade jong baroh ki bynta jong ka imlang-sahlang.
“Dei na kata ka daw ba ka BSP ka don la ka jong ka jingburom hapdeng baroh ki bynta jong ka imlang sahlang,” ka la ong.
