Patna, Nailur:
U nongseng jong ka Jan Suraaj Party uba dei ruh u MLA jong ka Bankipur u Prashant Kishor ha ka sngi u Blei u la pynbna ba ka seng kan ai kam 10 hajar tylli ki kam sha ki samla bym donkam don jam kiba la nang la stad ha kito ki konstitwensi kiba ki kyrtong jong ka kin jop ha kane ka elekshon MLC ban wan.
Haba ïakren bad ki lad pathai khubor ha shilynter ban pynmih ïa ka thup ki kyrtong na ka bynta ka elekshon MLC ka ban sa wan, u Kishor u la ong ba kan dei ka jingkitkhlieh jong ka Jan Suraaj Party bad ki kyrtong kiba jop ban pyndep ïa ka jingkular ba la khlei ha ki paidbah nongthep vote hashwa ka elekshon.
“Nga pynthikna ïa phi ba yn ai kam 10,000 tylli ïa ki samla khlem kam kiba la nang la stad ha man la ka konstitwensi na kaba ka Jan Suraaj Party ka pynrung kyrteng ïa ka jingjop jong ka ha ka elekshon. Nga la ai kajuh ka jingkular ïa ki nongjied jong ka Bankipur konstitwensi shwa ka elekshon shiteng samoi kaba la long dang shen,” u la bynrap.
Ka elekshon kan long ha ki saw tylli ki Graduate bad saw tylli ki nonghikai.
Haduh mynta ka tnad elekshon kam pat pynbna ïa ka por thep vote. Ka samoi treikam jong ki sitting member kan kut noh ha u bnai Naiwieng mynta u snem.
“Ki nonghikai ki don ka jingkhmih lynti kaba khraw na ka Jan Suraaj Party bad kine kiba hadien kin pyrshang ban wan katkum ka jingkhmih lynti jong ki. Nga hi nga ïeng ha ki jingdawa ba shisha bad kiba dei hok jong ki”, la ong u Kishor, haba pynpaw ïa ki jingeh ba ki dkhot jong ka seng nonghikai ki ïakynduh.
Kham mynshwa, u nongïalam ka Liang Pyrshah ha Bihar Assembly u Tejashwi Prasad Yadav u la ther tyngeh ïa ka sorkar NDA ba la ïalam da u Samrat Choudhary ha kane ka jylla halor ka jingkynnoh ba ka la pynlut T.100 klur ban pynmeh ïa ki sharak ha ka sngi kha jong u Myntri Rangbahduh ka ri u Narendra Modi.
“Ka pisa kaba heh bha la pynlut ha ka jingrakhe sngi kha jong u Myntri Rangbahduh haba ki 15 tylli ki distrik jong ka Bihar ki shah ktah jur ha ka jingshlei um. Phi dei ban ïohi ba palat 45 lak ngut ki briew ha Bihar ki mad jingeh namar ka jingshlei um kaba pynjot; kim don bam ne um khuid, bad ki jingim ki duh noh,” u la bynrap.
U la kynnoh ba ka sorkar kam shym la lah ban pynbeit bha na ka bynta ki nongshah shlei um. “Ha ka jaka kata, ha ka sngi kha jong u Myntri Rangbahduh, ka pisa kaba phylla kaba T.100 klur, kaba la sei na ka pla tyngka jong ka jylla kaba la duh lut, la pynsyrwa kai tang ha kaba pynmeh ïa ki sharak,” ong u nongïalam ka RJD ha ki lad pathai khubor.
Kane ka jingkren jong u Tejashwi ka wan ha ka por ba ka Bihar ka dang ïakhun pyrshah ïa ka jingshlei um kaba jur, ha kaba haduh 50 lak ngut ki briew ki la shah pynkynriah jaka ha kylleng ka jylla.
Ha kawei pat ka liang, u Tejashwi u la kynnoh ba ka BJP ka la pynlong ïa ka ‘Seva Sankalp Abhiyan’ ha baroh kawei ka ri naduh ka 17 tarik u Nailur haduh ka 17 tarik u Risaw ban rakhe ïa ka sngi kha jong u Modi, ha kaba katto katne ngut ki nongïalam ka BJP bad ki Myntri Rangbah ki la ai khublei, u la pynskhem.
