Patna, Nailur:
Ka sorkar Bihar ka la ai ïa ka jingmynjur ïa ka jingtyrwa ban seng ïa ka skulbah ba kyrpang jong ki kynthei ba nyngkong eh jong ka Bihar, “Maa Sita Women’s University”, ha Patna ha ki khyndiat sngi jong ka taïew ba la lah.
Ïa ka jingtyrwa jong ka tnad pule puthi jong ka jylla ha kaba ïadei bad kane la mynjur ha ka jingïalang jong ka kynhun Myntri jong ka jylla kaba la long hapoh ka jingpynïaid jong u Myntri Rangbah ka jylla u Samrat Choudhary.
La mynjur haduh 24 tylli ki jingtyrwa kiba ïadei bad ki katto katne ki bynta, kynthup ïa ka pule puthi, ka kam pulit, ka kam pynroi dud bad ka koit ka khiah.
Ka Maa Sita Women’s University yn seng katkum ka aiñ jong ki skulbah ba kyrpang jong ka Bihar, 2026. Ka skulbah jong ki kynthei ha Patna kan don ka bor synshar halor baroh ki kolej kynthei kiba don ha ka thaiñ bad kiba ïasoh bad ki kolej jong ki kynthei ha Patna, lait noh tang ki kolej kynthei kiba wan hapoh ka skulbah Patna.
Kum shi bynta ban seng ïa ka skulbah, la ai ïa ka jingmynjur jong ka bor synshar kaba T.15 klur na ka bynta ki jinglut jingsep kum ka tulop jong ki ophisar bad ki nongtrei. La khmih lynti ba kane ka skulbah thymmai kan pynïar ïa ki lad jingpule kiba kham shalor na ka bynta ki samla pule kynthei.
Ka kynhun Myntri ka la mynjur ruh ban buh ïa ka skulbah Ramdhari Singh Dinkar ban buh ha Begusarai. La ai ruh ïa ka jingmynjur jong ka bor synshar kaba T.15 klur na ka bynta ki jinglut jingsep kum ka tulop jong ki ophisar bad ki nongtrei jong katei ka skulbah.
Ïa kane ka rai ban plie ïa ka skulbah ba thymmai kaba la ai kyrteng ïa u Ramdhari Singh Dinkar, u nongthoh kot ba pawnam ha ka ri, la shim ha ka sngi kha jong u ha Begusarai. U Myntri Rangbah ka jylla u Samrat Choudhary u la ai ka jingpynbna ha kaba ïadei bad kane ha kane ka sngi.
Ka Ramdhari Singh Dinkar University, Begusarai, kan don ka jingsynshar halor baroh ki Constituent bad Affiliate college kiba don ha Begusarai bad Khagaria.
Hynrei ki kolej kiba don bynta bad kiba ïasoh bad ka Kameshwar Singh Sanskrit University, Darbhanga, kin ym hap hapoh ka jingpeit jong ka Dinkar University kaba dang shu thaw thymmai.
Ka kynhun Myntri ka la ai ïa ka jingmynjur jong ka synshar khadar kaba T.336.85 klur na ka bynta ban pynkhlain ïa ki pulit distrik, ki pulit rel, ka Prohibition and State Narcotics Control Bureau, bad ban thied ïa ki tiar ban pyndonkam ha Lok Bhavan.
Ka kynhun Myntri ka la mynjur ruh ban thied ïa ki 50 tylli ki Drone hapoh ka Police Modernization Scheme ba la bei tyngka da ka sorkar pdeng, ha ka jinglut kaba T.24.50 klur.
Ïa kine ki Drone yn pyndonkam na ka bynta ki kam kum ka jingpynïaid ïa ki paidbah, ki kam ha ki jaka wah, ki kam pyrshah ïa ki Naxal bad ka jingpynïaid ïa ki jingjia ba sngewsih.
Kumjuh ruh ki skhim pynroi dud ha Supaul, Madhepura bad Saharsa kiba hap hapoh ka Kosi Milk Producers Cooperative Union, kum shi bynta jong ka Saat Nischay-3, la mynjur.
Ïa ka tulop jong ki Chairperson bad Vice-Chairperson jong ki Board, Corporation bad Council bapher bapher la pynkylla sha ka 65 hajar shibnai na kaba long mynta ka long 25 hajar shibnai.
Kumjuh ruh ïa ka bai bylla man ka sngi la pynkiew na kaba la don lypa T.1,000 shisngi sha ka T.3,500 shisngi. Ki briew kiba bat ïa ki kyrdan Myntri kin ïoh ïa ka bai pdiang sngewbha kaba T.30 hajar pyrshah ïa kaba la don lypa kaba T.18 hajar.
Kito kiba don ha ka kyrdan Myntri sorkar jylla kin ïoh T.29,500 pyrshah ïa ka T.17,500 kaba la don lypa, katba ki Myntri Rangbah kin ïoh ïa ka Hiked Allowance kaba T.29,000 pyrshah ïa ka T.17,000.
