Bengaluru, Nailur:
Katba ka dorbar kyrpang jong ka ïingdorbar thaw aiñ jong ka Karnataka kaba saw sngi ka la kut ha ka sngi Palei jong ka taïew ba la lah, ka sorkar jylla ka la pynbna ïa ka jingïarap pisa ba shipor kaba T.2,500 kawei na ka bynta kumba 50 lak ngut ki nongrep kiba la shah ktah ha ka jingkyrduh um, kaba kynthup ïa ka jingpynlut kaba la antad haduh T.1,250 klur tyngka katba dang ap ïa ka jingïarap na ka sorkar pdeng hapoh ka jingtreikam jong ka National Disaster Response Fund (NDRF).
U Myntri Rangbah ka jylla u DK Shivakumar, haba jubab ïa ka jingïakren halor ka jingkhriat ha ka Ïingdorbar, u la tyrwa ban ïalam ïa ka kynhun ba kynthup ïa baroh ki seng sha u Myntri Rangbahduh ka ri, u Narendra Modi, da kaba pan jingmap ïa ka ram rep na ka sorkar pdeng.
U Myntri Rangbah u la ïathuh ha ka ïingdorbar ba ka jylla ka kloi ban kit ïa la ka jong ka bynta ha ka jingkit kaba khia ha ka liang ka pisa tyngka lada ka sorkar pdeng ka mynjur ïa ka jingpynlait. Kane ka jingtyrwa ka la wan ha ka por ba ki nongthaw aiñ jong ka BJP bad ka JDS ki la pynlong ïa ka jingïakhih, da kaba dawa ban pynlait ïa ka ram rep haduh 2 lak tyngka na ka bynta uwei u nongrep.
“Ngi dei ban pynneh pynsah ïa ki nongrep jong ngi hapdeng ka jingkyrduh um. Kumba ka sorkar pdeng ka la pyllait ïa ki ram kiba shongdor da ki lak klur na ka bynta ki nongkhaïi, ka dei ban pyllait ïa ki ram jong ki nongrep ruh kumjuh. Ngi long kiba kloi ban kit ïa ka bhah jong ka jylla ha ka jinglut. Ngan sa dawa ka jingïakynduh bad u Myntri Rangbahduh bad u Myntri ka tnat ki kam pohïing u Amit Shah. Ai ba kin long ki nongïarap ha kaba ïadei bad kane ka jingkit. Wat lada ngi don saw tylli ki projek ban pynduh, nga long uba la pynkhreh ngam kwah ïa ka jingïakynad, nga kwah ïa ka jingïatreilang,” ong u Shivakumar.
U Myntri Rangbah u DK Shivakumar u la kdew ïa ka jingpynlait ïa ka ram rep ba la pynbna da ka sorkar UPA hapoh ka jingïalam u Myntri Rangbahduh u Manmohan Singh ha kata ka por, bad u la kyntu ïa ki nongïalam ka Liang Pyrshah ba kin ïadon bynta lang bad ka kynhun sha ka sorkar pdeng. “La ka long 50:50, 60:40 ne 70:30 formula, la ka long kumno kumno ruh, sngewbha ïarap ban pynbiang ïa ka jingïarap na ka bynta jong ngi na ka sorkar pdeng”, u la kyrpad ïa ka Liang Pyrshah. U la kren ruh ha ka Council.
U Symbud Myntri Rangbah bad u Myntri ka tnad lum khajna u G Parameshwara u la ong ba 177 tylli na ki 240 tylli ki Taluk jong ka jylla la pynbna ba ki la shah ktah ha ka jingkyrduh um, bad ka sorkar kan sa bishar bniah ïa ki jingduhnong katkum ki kyndon jong ka NDRF.
Ïa ka jingduhnong la antad shwa ba kan long kumba T.40,000 klur, bad yn sa aiti ïa ka kot jingkynmaw ban pan jingïarap sha ka sorkar pdeng ha ka por kaba kloi tam.
“Da kaba khmih lynti ïa ka jingïarap jong ka NDRF, ka sorkar jylla kan ai, da kaba treikam mardor, ïa ka Input Subsidy kaba T. 2,500 na ka bynta uwei u nongrep. Kane kan pynlut ïa ka pla tyngka jong ka jylla T. 1,250 klur, kaba ym dei ka pisa kaba rit. Ngin kner ruh ïa ka kti jingïarap sha ki nongrep ha kiwei pat ki rukom,” ong u Parameshwara. Ïa ka jingpynsangeh ban siew ïa ka ram mar rep la pynjlan na ka 36 bnai sha ka 60 bnai, kaba ai por shuh shuh ïa ki nongrep kiba ïakynduh jingeh ha ka liang ka pisa tyngka, u la ong.
U Parameshwara u la tyrwa ruh ba ka Assembly kan mynjur ïa ka Resolution kaba kyntu ïa ka sorkar pdeng ban pynbna ïa ka jingkyrduh um kum ka jingma jong ka ri, da kaba kdew ba 17-18 tylli ki jylla ki ïakynduh ïa ka jingkyrduh kaba jur bha.
Hynrei u nongïalam ka liang pyrshah u R Ashoka u la kynnoh ba ka jingai jingïarap mar rep kaba T.2,500 kam biang bad u la pynkynmaw biang ïa ka jingdawa ban pyllait ïa ka ram rep.
U Ashoka u la ong ba u Myntri Rangbah u la ïoh ïa ka lad ban “pynshisha ïalade kum u khun jong u nongrep bad ban pynduh ïa ka dur jong u kum u nongrep” da kaba shim ïa ka rai halor ka jingpyllait ïa ka ram rep, wat hapdeng ka jingeh ha ka liang ka pisa tyngka kaba don bynta. U Shivakumar u la kynthoh biang, da kaba ong ba u leh ïa ka kam khaïi bad kaei kaba bakla ha ka.
Kane ka dorbar kyrpang kaba la buh nyngkong ban long lai sngi naduh ka lah sngi U Blei ban ïakren halor ka jingkyrduh um bad ka kaiphod jong u Dr K Kasturirangan halor ki Western Ghats, la pynjlan da shisngi.
U Lamphang u G S Patil u la ong ba ka ïingdorbar thaw aiñ ka la pynlong ïa ki kam haduh 25 kynta bad 45 minit.
U Myntri barim u HK Patil u la ïada ïa ka jingpynlong symbai lyoh jong ka sorkar, da kaba ong ba ka dei ka rukom stad saïan kaba la pyndonkam ha kylleng ka pyrthei ban pynmih slap. Hynrei u la kam ba ka por kam long kaba biang bad ba la dei ban leh ïa katei ka jinglehkai lai bnai shwa.
U Ashoka u la kyntait ba katei ka jingleh kam dei ei ei hynrei ka dei ka “jingïateh beaiñ” bad u la kynnoh ba ka pisa kaba T.28 klur ka la jah rngai.
U MLA ka Ranebennur Congress u Prakash Hukkeri uba ka Firm jong u khun jong u ka la ïoh ïa ki Tender na ka bynta ka jingbet ïa ki symbai, u la ong ba lah ban leh wat ha u bnai Risaw namar ba ka sorkar pdeng ka don ïa ka SoP. “Ka la don ka jingwad bniah kaba bniah kaba la leh da ka sorkar pdeng bad ïa ki jinglap dei ban pynphriang sha ki jylla”, u la kyntu.
Ka rukom pynkhluit lah ban pyndonkam ha ka por Lyiur bad ki aïom hapdeng u bnai Nailar bad Risaw, u la kam da kaba kynthoh ba ka jingpynmih symbai kam shym la slem.
