Bhubaneswar, Nailur:
Haba dang sah sa khyndiat taïew ban poi sha ka jingrakhe ïa Durga Puja, ki pulit ka Commissionerate ha ki khyndiat sngi jong ka taïew ba la lah ki la pynlong ïa ka jingïalang pynkhreh hangne ban pynthikna ba kan long kaba ïaid beit ïaid ryntih bad kaba shongsuk shongsaiñ ïa kane ka jinglehniam.
Ïa kane ka jinglehniam la buh ban rakhe naduh ka 16 haduh ka 21 tarik u Risaw. Ha kane ka jingïalang ba la pynïaid da u Police Commissioner jong ka Bhubaneswar-Cuttack u S Dev Datta Singh la don lang ruh u Additional Commissioner u Narasingha Bhola, bad ki MLA u Babu Singh, u Ananta Narayan Jena, u Susant Kumar Rout bad u Naba Kishor Mallick.
Ha kane ka jingïalang la ïashim bynta ruh da ki nongmihkhmat jong u MP ka Bhubaneswar bad ki komiti puja bapher bapher.
Ka jingïakren ka long halor ka jingïatreilang kaba ïaid beit ïaid ryntih hapdeng ki pulit ka Commissionerate, ki komiti puja, ki BMC, TPCODL bad kiwei kiwei ki tnad ban pynlong ïa ka tamasa kaba shongsuk shongsaiñ.
La ïakren ruh ïa ki jingai jingmut halor ka jingpahara, ka jingpynïaid ïa ka leit ka wan, ka jingpynïaid ïa ki paidbah, ka jingpom dieng, ki jingïaid proseshon bad ki jingpynbeit ban pynngam um khnang ban pynthikna ïa ka jingshngaiñ jong ki paidbah.
La bishar bniah ruh ïa ki jingpynbeit ba bniah ïa ka jingpahara bad ka leit ka wan kaba kynthup ïa u Sasthi haduh u Bhasani.
Haba kren sha ki lad pathai khubor, u Singh u la ong ba ki pulit ryngkat bad ki heh jong kiwei pat ki tnad kin pynlong ïa ka jingjurip lang shwa bad kin buh ïa ki kamra peitngor baroh shisngi hajan hynñiew tylli ki medha kiba kongsan.
Yn pynbiang ïa ka jingpahara kaba kyrpang na ka bynta ki chandi medhas, nalor ka jingpynbna pulit kaba biang kaba la pynthikna ha kylleng ki jaka puja na ka bynta ban pynïaid ïa ki paidbah bad ki lad jingïaid kali kiba khlaiñ.
“Yn pynleit jingmut kyrpang ruh halor ka jingpahara ïa ki nongwan jngohkai. Yn buh ïa ki pulit kiba phong da ki jaiñ rit na ka bynta ka jingshngaiñ jong ki kynthei bad yn pynlong ïa ka jingpahara mobile ha ki jaka ba ap jingma. Ki pulit CAPF, STU bad ki shipai pahara kin sa don ha ki jaka ba dei ban pyntreikam, katba ki shipai ODRAF kin treikam ha ki bynta jong ki Ghat,” u la bynrap.
Kumba 300 ngut ki ophisar kiba don ki kyrdan bapher bapher, 40 tylli ki kynhun jong ki bor pulit bad kawei ka kompeni jong ka CAPF yn buh ban pynneh ïa ka suk ka saiñ. Sa 40 tylli ki kynhun pulit kiba kynthup ïa ki nongap ïing, ki kynthei bad kiwei kiwei yn pyntreikam ha kane ka jingrakhe, la pyntip u heh pulit.
Nalor kine, yn sa buh sa hynñiew tylli ki kynhun ki pulit ha ka por Ravan Podi bad Bhasani.
Ki pulit ki la kyrpad ïa baroh ki komiti puja bad ki nongshong shnong ban ïatreilang bad ki kyndon ba la buh ha ka liang ka jingïada, ka jingïaid kali bad ka jingpynïaid ïa ki paidbah khnang ban pynthikna ba ka jingrakhe kan long kaba ïaid beit ïaid ryntih.
Mynta u snem, yn buh haduh 193 tylli ki Medhas ha ka nongbah, kynthup ïa 49 tylli (ka kyrdan – A lane ki pandal ba hakhliehduh), 71 tylli (ka kyrdan-B) bad 73 tylli (ka kyrdan-C) ryngkat bad 24 tylli ki chandi medhas bad hynñiew tylli ki meena bazaar.
Kum shi bynta jong ka jingrakhe, la ithuh ïa 8 tylli ki jaka Ravan Podi bad ki jingleit pynngam paidbah ha ka nongbah.
