Bhubaneswar, Nailur:
Ka jylla ka la lum palat T. 3.05 lak klur na ka kam tih marpoh khyndew, kynthup ïa ka DMF, ha ka shi snem naduh u snem 2016-17 haduh u snem 2025-26, ha kaba ka jingïoh lum man la u snem ka kiew bha ha kine ki snem ba la dep.
Ïa kane la pyntip da u Myntri ka tnad Steel and Mines u Bibhuti Bhushan Jena hapoh ka ïingdorbar thawaiñ ha ka sngi Palei haba jubab ïa ka jingkylli na u MLA ka BJD u Dhruva Charan Sahu. Katkum ka jingkheiñ ba la buh da u Myntri, ka sorkar jylla ka la lum T.2.70 lak klur kum ka khajna na ka jingtih mawshun, khlem da kheiñ ïa ka DMF, ha katei ka por katba tang ka jingïoh lum jingsiew ka long T.1.27 lak klur.
U la ong ba ka jingmih na ka jingtih marpoh khyndew, khlem da kheiñ ïa ka DMF, ka la kiew na ka T.5,134.90 klur ha u snem 2016-17 sha ka T.46,710.57 klur ha u snem 2025-26. Lada kynthup lang ïa ka DMF, ka jinglum khajna ka la kiew na ka T.7,328.53 klur sha ka T.51,127.10 klur ha kajuh ka por. Ka jylla ka la lum T.49,859.12 klur na ka khajna na ka kam tih marpoh khyndew ha u snem 2021-22, kaba dei ka jinglum khajna kaba heh tam man la u snem hapoh ka shi snem.
U Jena u la ïathuh ba ka jingïoh lum khajna baroh ha une u snem mang tyngka ba mynta (2026-27) haduh ka 15 tarik u Nailur, ka long T.21,586.19 klur bad haba shim ïa ka jingïoh lum jong ka DMF kaba T.2,183.22 klur, ka jingïoh lum baroh ka poi sha ka T.23,769.41 klur.
Ha ka jubab ba kyrpang sha u Myntri barim bad u MLA ka BJD u Ranendra Pratap Swain, u la ong ba ka Odisha kam don satia ïa ka bai tih marpoh khyndew kaba lah ban siew biang na ka sorkar pdeng, namar ïa ka bai tih marpoh khyndew la lum beit beit da ka sorkar jylla na ki nongshim wai tih marpoh khynbdew.
U Myntri u la ong ba ka jylla ka la lum T.20,417.64 klur ha ka jingpynshitom pyrshah ïa ki nongtih Iron Ore bad Manganese namar ka jingpynkheiñ ïa ka kyndon aiñ hadien ka rai jong ka Supreme Court ha ka 2 tarik u Nailar, 2017.
Ki jingdawa ki kynthup ïa ka pisa kaba T. 18,169.14 klur na ka bynta ka jingpynkheiñ ïa ka mariang bad ka jingpynkhuid khlaw, 357.67 klur kaba ïadei bad ki mar bym pat pynduh bad 1,890.83 klur na ka bynta ki jingpynkheiñ ïa ki plan tih marpoh khyndew bad ka jingmynjur ban treikam. Na baroh ki jingpynshitom, la ïoh biang T.17,701.23 klur, kynthup ïa ka sut, kaba sah sa T.2,695.26 klur kaba dang sahteng. Hadien ba ka sorkar BJP ka la wan ha ka bor, la ïoh ban siew T.46.89 klur na ki ram kiba dang sahteng.
U Myntri u la ong ba ka jingtohkit ban siew biang ïa ki nongshim wai kiba khlem siew ka dang sahkut ha khmat ki ophisar ba ai syrnot katkum ka aiñ siew bai lutksan jong ka Odisha.
