Guwahati, Risaw:
U Myntri Rangbah ka jyllla Assam u Himanta Biswa Sarma ha ka 12 tarik u Risaw, u la pynbna ïa ki jingïalang paidbah kiba jai jai ha ki ophis treikam jong ki distrik ha kylleng ka jylla naduh ka 13 tarik u Risaw haduh ka 31 tarik u Risaw, da kaba kynnoh ïa u Rahul Gandhi u nongïalam ka Congress ba u la pynsniew ïa ki tnat treikam synshar paidbah lyngba ka jingkynthoh jong u ïa ka Election Commission of India (ECI) bad thmu ban pynlong da ka jingïaid paidbah sha Supreme Court.
Kane ka jingpynbna ka long ha ka por ba u Gandhi u dang pynkhreh ban ïalam ïa ka jingïaid paidbah jong ka kynhun INDIA bloc ha New Delhi ha ka 12 tarik u Risaw, kata hynnin ka sngi pyrshah ïa ka jingtreikam jong ka kynhun ba dei khmih ïa ka elekshon. Kane ka jingïaid paidbah kaba la thmu ban sdang na Connaught Place bad ban ïaid sha Supreme Court kan ïaid shakhmat watla u Chief Justice of India (CJI) u la kyntait ïa ka jingkyrpad ban ïakynduh ïa ki MP ka liang pyrshah halor kane ka mat.
Ha ka jingthoh halor ka rynsan X, u Sarma u la kynnoh ba ka Congress ka buh jingkylli ïa ki jingmih na ka elekshon da kaba jied, da kaba kynnoh ba ka seng ka pdiang ïa ki jingmih haba ka jop hynrei ka tuklar ïa ka rukom synshar paidbah haba ka rem.
“Ka jinglong arliang mamla jong ki ka long kaba shai bha ban ïohi”, la ong u Sarma, da kaba kynthoh ba u Rahul Gandhi u la buh jingkylli ïa ka jingshah jied jong u Narendra Modi kum u Myntri Rangbahduh katba ka jingshah jied jong u hi sha ka Parliament bad hadien kata ka jingshah kyntiew kum u Nongïalam ka Liang Pyrshah ka dang sah khlem jingkylli.
U la kynthoh shuh shuh ïa ka rai jong u Gandhi ban leit sha Supreme Court hadien ba u CJI u la kyntait ïa ka jingkyrpad ban ïakynduh, da kaba kynnoh ïa u nongïalam ka Congress ba u pyrshang ban pynkhiah da ka kam saiñ hima sima ïa ka tnad bishar.
“Ym lah ban pynlong ïa ki tnad treikam jong ka Riti synshar ban kitkhlieh ïa ki jingsngewsih jong ka seng ha ka elekshon,” ong u Sarma.
U Myntri Rangbah u la pynbna ba ka tnad Assam jong ka BJP kan pynlong ïa ki jingïalang ban pynpaw ïa kaei kaba u la batai kum ka jingpyrshang jong ka Congress ban “pynjah burom ïa ki Riti synshar jong ngi”, ban ïada ïa ki nongwan rung be-aiñ da kaba pyrshah ïa ka jingpyntreikam ïa ka (SIR) ïa ki thup nongthep vote, bad ban pynduh ïa ka bor synshar paidbah.
U Sarma u la ong ruh ba kane ka jingïakhih kan pynskhem biang ïa ka jingkyrshan jong ka BJP ïa u Myntri Rangbahduh ka ri u Narendra Modi bad ïa ka jingthmu jong u ban ïoh ïa ka ri India kaba la roi ha u snem 2047. U la pynskhem ba “ka jingbthah jong ki paidbah ka dei hok ban ïoh burom” bad ba ki tnad Riti synshar ki dei ban dang long kiba laitluid.
