Djibouti, Risaw:
Ha kane ka jingjia ba sniewbok, la ong ba 139 ngut ki phetwir, kiba kynthup ïa 15 ngut ki khynnah rit, ki la duh ei noh ïa ka jingim hadien ba kawei ka lieng heh ka la kylla ha ki bynta rud duriaw jong ka Djibouti ha ka miet jong ka 8 haduh 9 tarik jong u Risaw, ha kaba kiwei pat ki 84 ngut ki la jah rngai naduh katei ka jingjia, khlem kino- kino ki jingtip ba iadei shaphang jongki.
Kitei kiba la lait im, ki iathuh ba katei ka jhad, kaba kit ïa 305ngut ki briew, na Djibouti sha Yemen, ka la kylla noh shaphang shatei jong ka nongbah Obock ha Djibouti, ong ka kyrwoh jong ka International Organisation for Migration (IOM).
“Ki briew kiba lait im, ki iathuh ïa nga, ba katei ka lieng, ka la sdang ban ngam shadien, tang mar ïa rung ha ka”, la ong u Alexandre Coissac, uba dei u heh jong ka IOM ha Djibouti, haba kren sha ki nongthoh khubor.
“Kane ka dei ka jingduhnong kaba khraw ïa ka jingim”, u la ong ha katei ka kyrwoh.
“Ka jingsngewlem jong ngi ka long na ka bynta kiba lait im bad ki bahaïing hasem kiba la duh noh ïa kiba ieid ba thoiñ ne kiba dang sah khlem khubor na ki bahaïing hasem jong ki.”
U Coissac u la ong ba ki kynhun jong ka IOM ki don ha katei ka jaka ryngkat bad ki bor synshar jong ka Djibouti ban ai jingiarap kyrkieh.
“Kane ka jingjia ba sngewsih ka long ka jingpynkynmaw kaba shai bha ïa ki jingma kiba ki nongwan buhai shnong ki iakynduh ha kane ka lynti iaid jong ki nongwan buhai shnong katba ki dang wad ïa ki lad kamai” da kaba pyrshang ban iaid lyngba ïa ka duriaw Bab al-Mandeb sha Yemen bad nangta ban poi sha ki ri jong ka Gulf.
Napdeng ki 109 tylli ki met iap ba la ioh kurup ki don 52 ngut ki shynrang, 42 ngut ki kynthei bad 15 ngut ki khynnah, ba kynthup ïa 9 ngut ki khynnah kynthei bad 6 ngut ki khynnah shynrang, ong ka kyrwoh.
Palat 80 ngut ki briew ki la lait im na ka jingtwa ka lieng, baroh ki dei ki nong Ethiopia.
“Ka jingduk, ka jingbymshngain bad ka jingktah kaba nang jur jong ka jingkylla ka suinbneng ka pynlong ïa kiba bun ban shim ïa kane ka jingleit, wat hapdeng ka jingbym shngain kaba nang kiew ha kylleng ka Middle East,” la ong ka IOM.
