Kumba ngi tip ngi la shah synshar ha ka Sorkar Assam la slem bah ka Shillong ka la long ka Nongbah jong ka Sorkar Assam. Ha ka por ba dang synshar ka Sorkar Assam bun bah ki Shnong Khasi bad Garo la pynhap noh hapoh ka kamrup District ban kham suk kham jan ha ka jinglum khajna ka Sorkar. Ngi tip ruh ba ka Hima Khasi ka Hima Nongmynsaw ka la shah pynduh noh la slem bah bad ym don Hima shuh, dei u (L) Bah Hopingstone Lyngdoh uba la pynkhih thymmai ïa ki shnong Khasi bad Garo ka thaiñ Langpih ba don jingïakajia pud mynta bad ka Asam ba ki dei ban hap hapoh ka United Khasi – Jaiñtia Hills District bad ym shuh bad ka kamrup District, u Bah Hoping u la ïaleh ban pynrung kyrteng nongthep vote jong kito ki shnong Khasi, Garo sha ka United Khasi – Jaiñtia Hills District bad hapoh ka MLA Constituency Nongstoiñ bad u la thaw thymmai ïa ka raid mynsaw bad pynhap noh shipor bad ka Hima Rambrai Syiemship bad ha ka jingïa-sngewthuh jingmut bad u Syiem Rambrai u (L) Helishon Syiem bad la thung myntri ïa u (L) Bah Jese Snar na ka shnong Mawdiangsnam ban peit ban synshar ia ka raid Nongmynsaw namar ym don Hima Nongmynsaw shuh ha kito ki por, u Bah Hopingstone MLA u la seng ruh katto katne ki skul ha kito ki thaiñ Langpih. Lada ym dei ka jingïohi jngai bad trei borbah u Bah Hoping kan ym don jingïakajia pud eiei shuh mynta ha kito ki thaiñ Langpih baroh ki Shnong Khasi bad Shnong Garo ka thain Langpih ki la leit bad hap suk sha ka kamrup District bad ym don jingïakajia pud eiei shuh kumba long mynta. Ha ka por ba pynhap noh ïa ki Shnong Khasi – Pnar ka thaiñ Jaiñtia sha ka Mikir Hills District ba la tip kum ka Block – I bad Block – II mynta ka la leit suk sha ka Mikir Hills District (mynta Karbi Anglong District) namar u MLA ka Jowai Constituency um pynpaw pyrshah eiei bad ki paidbah Khasi – Pnar ruh kim pynpaw pyrshah eiei, mynta bun bah ki Shnong Khasi – Pnar ki la hap suk sha Assam. Ka don ka jingdawa mynta ban wanrah biang ïa ka Block – I bad Block – II sha Meghalaya tip lah ne ym lah shuh namar ka la don shabar naduh u snem 1951 haduh mynta. U (L) Bah Hopingstone Lyngdoh u dei uwei u Rangbah Khasi Nongsaiñ Pyrthei uba ïohi jngai uba la trei shitom ban ïada ïa ka jaidbynriew Khasi uba ïaineh ha ka party u bym ju kylla Party haduh ka sngi jingïap, u dei u nongïaleh pynïoh Hills State uba khraw tam ka jaidbynriew ka kynmaw ieit ïa u.
Dr. Boss Lander Marthong
New Nongstoiñ
