Ka Hima Shillong ka long kawei na ki Hima kaba khraw bad kaba khlaiñ bha haduh ka Spah snem kaba khadkhyndai. Hynrei ha ka snem 1853, la phiah noh ïa kane ka Hima Shyllong hapdeng ki artylli ki Hima, ïa kiba la tip kum ka Hima Khyrim ne Nongkrem bad kawei pat ka Hima Mylliem. Ka bynta kaba shaphang mihngi bad kaba heh bad kham ïar ka long mynta jong ka Hima Khyrim ne Nongkrem bad ka bynta kaba shaphang sep-ngi, kaba kham rit ka long ka Hima Mylliem. Hadien ka jingphiah ïa ka Hima Shyllong, U Dr. Homiwell Lyngdoh, ha ka kot jong u, ‘Ki Syiem Khasi bad Synteng,’ u la thoh ba ki Syiem Nongkrem ki hiar pateng na ka kpoh jong ki Syiem Shyllong hyndai kaba bat ïa ka Longsyiem bad ka niam, hynrei ki Syiem Mylliem, ki hiar pateng na ka kpoh ka khadduh. Namarkata ngi iohi ba ki SYiem Nongkrem ki don ka niam hynrei ki Syiem Mylliem kim don. La pynshai ruh ba ka Niam ki Syiem kaba la seng ha Nongkseh, ka sah bad ki Syiem Nongkrem namar ki long kiba hiar pateng na ka liang ka Syiemsad jong ki Syiem Shyllong. Halor kane ka nongrim, ka Kñia ka khriam, ka leh niam leh rukom, ka long noh ka jong ki syiem Khyrim ne Nongkrem bad na kane ka daw, u Syiem longsyiem jong ka Hima Khyrim ne Nongkrem u long u briew uba don ha ka Niam Khasi. Namarkata, u briew uba la long Khristan, um lah shuh ban kiew ne long u Syiem jong ka Hima Khyrim ne Nongkrem. Ha ka jingïadei pat bad ka Hima Mylliem, uno uno u jait Syiem na ka kpoh Mylliem u lah ban long u Syiem. Haba ngi ïaid pat sha ka spah snem kaba 20(Arphew) kata naduh 1901 haduh mynta ngi ïohi bad ngi shem ba kiba la long Khristan, ki la long ki Syiem jong ka Hima Mylliem, kata u Ronsing Syiem uba synshar naduh 1897 – 1914. U la long u Dkhot jong ka Balang Presbyterian Mawkhar. U Kmuiñ Manik Syiem (1914 – 1935) u long u Khristan. Hadien jong u, la wan long Syiem jong ka Hima Mylliem da u Sati Raja u dkhot ka Balang Khristan.
U Jormanik Syiem u dkhot jong ka CNI (Church of North India) ula long u Syiem naduh 1951 haduh January 1959. Ki snem kiba hadien ka 1960, ki la long ba ki Rangbah kiba la shah thung kum ki Acting Syiem bad ba la shah jied ban long Syiem, ki la long kham bun na ki Balang Khristan. Kine harum ki long ki Acting Syiem ba la thung da ki bor ka Khasi Jaiñtia Autonomous District Council bad hadien pat da ka Khasi Hills Autonomous District Council.
Jumsing Manik Syiem (Acting) Khristan – 1959 – 1963
Franciswell Syiem Khristan – 1963 – 1986
Armstrong Syiem (Acting) Khristan – 1986 – 1986
Sporso Manik Syiem (Acting) Khristan – 1986 – 1988
Armstrong Syiem (Acting) Khristan – 1988 – 1990
Laborious Manik Syiem Khristan – 1990 – 2002
Latho Manik Syiem (Acting) Niam Khasi – 2002 – 2006
Armstrong Syiem (Acting)Khristan – 2006 – 2007
Latho Manik Syiem Niam Khasi – 2007 – 2016
Ricky Nelson Syiem (Acting) Khristan – 2016 – 2018
Ainam Manik SYiem (Acting) Niam Khasi – 2018 – 2023
Ainam Manik Syiem Niam Khasi – 2023 – 2026
Alban F. Syiem (Acting) Khristan – 2026 ………….
Halor kine ki jingshisha, kam don kano kano ka jingkhang ne jingpyrshah ïa uno uno u jaid Syiem na ka Kpoh Mylliem ban long u Syiem jong ka Hima.
ïaineh Manik Syiem
