Srinagar, Risaw:
Ka Leh Apex Body (LAB) bad ka Kargil Democratic Alliance (KDA) ki la kyntait ïa ki jingtyrwa bathymmai jong ka Ministry of Home Affairs’ (MHA) kum ka “jingpynhiar ïa ki jingpynthikna ba kham mynshwa” bad ki la kular ban bteng ïa ka jingïakhih jong ki haduh ban da ai ïa ka Ladakh ïa ka bor thaw aiñ ba la jied ha ka kyrdan UT bad ka bor thaw aiñ kaba don ha ka kyrdan jong ka bor bad ki jingshngaiñ ha ka synshar paidbah hapoh ka jingtreikam jong ka Article 371(K).
Ki ar tylli ki seng ki la ong ba ka draft kaba 32 sla kaba la wanrah da ki heh jong ka MHA ha ka jingïakren ha ka kyrdan Sub-committee ha ka 15 tarik u Risaw ha Leh ka la duna bha ïa ki jingangnud jong ka Ladakh ban synshar paidbah bad ban ïada ïa ka khyndew ka shyiap, ka kolshor, ka ktien bad ki marpoh khyndew jong ka.
U Co-Chairman jong ka LAB, u Chering Dorjey, u la kynnoh ba ka MHA, ka la kynran bad kylla ktien na ki jingkular, kiba la ai ha ka jingïalang jong ka ha ka 22 tarik u Jymmang ha New Delhi, ha kaba ka la mynjur ban thaw ïa ka kynhun kaba la jied beit ha ka kyrdan UT, kaba don ïa ka bor thaw aiñ, ka bor pyntreikam, ka bor mang tyngka, ka bor ban buh ïa ka jingthmu bad ka bor pisa.
U Dorjey u la ong ba kane ka bynta kaba la tyrwa la khmih lynti ba kan pyndonkam ïa ka bor thaw aiñ halor ka khyndew ka shyiap, ka kolshor, ka ktien ka thylliej, ki khlaw ki btap, ka mariang, ki spah mariang bad kiwei kiwei ki sobjek kiba ka Union Territory ka ïoh katkum ka Article 240.
“Mynta ki kynran dien na ka. Ngim pat long kiba la khreh ban ïakren ïa ki jingtyrwa ba la wanrah da ka MHA. Kine ki jingtyrwa kim long kiba ngi lah ban pdiang”, la ong u Dorjey. U la pynskhem ba katei ka draft ka paw ba ka ïaid sha ka rukom treikam jong ka Territorial Council, kaba ka LAB bad ka KDA ki la dep ban kyntait.
U Dorjey u la kyntu ïa ka sorkar pdeng ban pdiang ïa ki jingtyrwa ba la aiti da ki ar tylli ki kynhun bad u la kynnoh ba ka la pyndonkam ïa ka “jingthied por” ban pynslem ïa ka jingpynbeit ïa ki jingdawa jong ka Ladakh.
“Ngin ym dem khrup na ka jingïeng jong ngi na ka bynta ka Ïingdorbar ha ka kyrdan UT bad ki jingïada jong ka Riti synshar katkum ka Article 371(K). Ngin bteng ïa ka jingïakhih jong ngi haduh ban da urlong ki jingdawa jong ngi,” u la pynskhem.
U Co-Chairman ka KDA u Sajjad Kargili u la ong ba baroh ar ka KDA bad ka LAB ki la khmih lynti ïa ka synshar paidbah kaba kham khlaiñ kaba la kyrshan da ki lad jingïada ba kyrpang jong ka Riti synshar.
“Ha ka jaka kata, ka jingpynwandur jong ka MHA ka la paw ba ka tyrwa ïa ka Territorial Council kaba don ïa ka bor kaba rit.”
“Hadien ba la ïoh ïa ka draft, ngi la ai jingmut bad ki riew shemphang ha ka liang ka aiñ bad ka Riti synshar bad ngi la sngewthuh ba kam long kaba ngi lah ban pdiang, ka Apex Body bad ka KDA ki kyntait ïa kane”, la ong u Kargili.
U la ong ba ki ar kynhun kin aiti ïa ka jingai jingmut jong ki sha ka MHA ha ka 22 tarik u Risaw, da kaba batai ïa ki jingpyrshah jong ki bad pan jingbishar biang.
