Shillong, Risaw 20
U Bah P.T Sawkmie, MLA barim u la ong ba ka por ka la poi ba ki nongïalehkai phutbol jong ka Jylla ki dei ban kilanmet ha ki madan phlang bad kumjuh ha ki madan Futsal.
U Bah Sawkmie u la kren ïa kane ha ka phainal phutbol jong ka Umjathang Sport Club kum u kongsan ha ka jingdon ryngkat u rangbah dong u Bah T.S Kharumlong, ki dkhot nongkitkam ka club bad kiwei kiwei.
U la pynpaw ïa ka jingsngewkmen ba ki la ïoh ban plie ïa kane ka lympung ïakhun ha ka taïew ba leit bad ha ka sngi Saitjaiñ ka 17 tarik u Risaw ki la ïoh ban pynkut.
U la bynrap ba u angnud ba ka Mawsiatkhnam ruh kan ïashim bynta ha ka lympung 4th Division jong ka Shillong Sports Association ha madan Polo.
Ha kane ka sngi la ïoh ruh ïa ka jingkren na u Bah Kharumlong, uba la pynpaw ïa ka jngsngewnguh bad ai khublei ïa u Bah PT Sawkmie, kiba la ïoh ban pynlong ïa kane ka Inter Dong Tournament.
Ha kane ka Inter dong phutbol jong ka Umjathang SC, la ïohrah da ka Lumheh SC, ka klob kaba dangshu dep thaw thymmai ha kine ki khyndiat sngi, da kaba pynliem ïa ka Umjathang da 4-3 ha ka jingïashut tie-breaker hadien ba ki la ïakhaid khlem don ba thep kol ha ka jingïalehkai kaba 70 minit jong ki ha madan Umpling Umjathang, Mawsiatkhnam.
